У беларускай сталіцы каля стэлы «Менск — горад-герой» і ў мэмарыяльным комплексе «Берасьцейская крэпасьць-герой» а 12-й гадзіне 2 красавіка прагучыць «Стрэл памяці» — адзіночны халасты стрэл з артылерыйскага ўзбраеньня.
«Зьвяртаем увагу жыхароў Менску і Берасьця, што ў дзень правядзеньня акцыі а 12-й гадзіне будзе чутны гучны стрэл. Просім захоўваць спакой. Мерапрыемства праводзіцца пад кантролем і кіраўніцтвам Узброеных сіл», — адзначаецца ў паведамленьні Міністэрства абароны Беларусі.
Адначасова ў вайсковым ведамстве Беларусі паведамілі, што 2-3 красавіка пад кіраўніцтвам начальніка кіраваньня тэрытарыяльнай абаронай — намесьніка начальніка Генштабу Ўзброеных сіл Беларусі адбудзецца трэнаваньне па кіраваньні фарміраваньне тэрытарыяльных войскаў.
У вучэньнях возьмуць удзел супрацоўнікі Менскага абласнога і раённых выканкамаў, вайсковых камісарыятаў Менскай вобласьці і органаў кіраваньня. У часе трэнаваньня плянуюць адпрацаваць пытаньні збору і аналізу інфармацыі, ухваленьня рашэньняў, правядзеньня разьлікаў, а таксама падрыхтоўкі распараджальных дакумэнтаў.
ГЛЯДЗІЦЕ ТАКСАМА: У Менску сфармуюць першы атрад «народнага апалчэньня»Тэрытарыяльныя войскі — род войскаў Узброеных сіл, які склікаецца ў пэрыяд вайны або напружанай ваенна-палітычнай абстаноўкі.
Рэжым Аляксандра Лукашэнкі няспынна праводзіць вучэньні, трэнаваньні, зборы на фоне абвастрэньня адносін з Захадам і поўнамаштабнай вайны Расеі супраць Украіны, у якой афіцыйны Менск падтрымлівае Крэмль.
ГЛЯДЗІЦЕ ТАКСАМА: «Лукашэнка незаменны для расейскай вайны», — аўтар кнігі пра Расею як імпэрыю, ірляндзкі прафэсар О Бяхань