Як паведамляе ізраільскае выданьне Ynet, грамадзянін Ізраілю, які прыехаў у Беларусь з жонкай і дзецьмі, быў затрыманы і прайшоў празь цяжкія фізычныя і псыхалягічныя катаваньні. Цяпер ён вызвалены і вярнуўся ў Ізраіль.
Імя пацярпелага на просьбу ягонай сям’і не называюць. Таксама невядома, ці ён рэпатрыянт зь Беларусі.
Паводле выданьня, ізраільца затрымалі ў пачатку лютага нібыта за «падпіску на экстрэмісцкае зьмесьціва», у прыватнасьці на фэйсбук-суполку, дзе абмяркоўвалі жыцьцё ў Ізраілі і Беларусі.
Сваякі лічаць, што сапраўднай прычынай арышту мужчыны стаў удзел ягонага сына ў дэманстрацыі ў Ізраілі ў падтрымку беларускай апазыцыі.
Пасьля арышту сувязь з мужчынам перапынялася, яго трымалі 15 дзён у ізалятары, дзе, які піша выданьне, яго марылі голадам і стасавалі іншыя мэтады катаваньня.
Ізраільскае выданьне Ynet таксама піша, што беларускія сілавікі забралі ў ізраільца дакумэнты, але пазьней ён атрымаў часовы пашпарт у пасольстве Ізраілю і змог вярнуцца дадому.
ГЛЯДЗІЦЕ ТАКСАМА: Выйшаў новы даклад пра катаваньні ў Беларусі, у якім сьведкі расказваюць пра жорсткасьць ГУБАЗіКу ГЛЯДЗІЦЕ ТАКСАМА: 795 грамадзян Беларусі пераехалі за год у Ізраіль у праграме рэпатрыяцыі