З 23 красавіка 2025 году ліміт страхавой кампэнсацыі пры афармленьні ДТЗ бяз выкліку ДАІ павялічыцца амаль у паўтара раза. Цяпер замест ранейшых 800 эўра можна будзе атрымаць да 150 базавых велічыняў, што складае 6300 рублёў (звыш 1700 эўра).
Указ № 108 «Аб страхаваньні» падпісаны 18 сакавіка 2025 году і апублікаваны на Нацыянальным праўным партале. У Галоўным упраўленьні ДАІ МУС пацьвердзілі, што дакумэнт уступае ў сілу 23 красавіка 2025 году.
Так званы «эўрапратакол» — спрошчаная працэдура афармленьня ДТЗ, якая дазваляе кіроўцам вырашыць усё на месцы, без прыцягненьня супрацоўнікаў ДАІ. Дзякуючы новым правілам карыстацца эўрапратаколам стане больш выгадна, асабліва пры нязначных аварыях, адзначае выданьне «Белорусы и рынок».
Умовы, пры якіх можна выкарыстоўваць «эўрапратакол»:
- У ДТЗ удзельнічалі толькі два аўтамабілі;
- Ніхто не пацярпеў;
- Абодва кіроўцы маюць дзейны страхавы поліс;
- Кіроўцы цьвярозыя і маюць пасьведчаньні кіроўцы;
- Кіроўцы згодныя з абставінамі аварыі і ня маюць спрэчак.
Блянк павінен быць запоўнены на месцы здарэньня. Усе разьдзелы блянку маюць быць запоўненыя ахайна, без памылак і выпраўленьняў. Як правіла, страхавыя кампаніі не прымаюць дакумэнты з выпраўленьнямі. Лепш, калі абодва ўдзельнікі ДТЗ папярэдне прагавораць усе моманты і высьветляць усе падрабязнасьці ДТЗ і пасьля гэтага пачнуць запаўняць блянк.
Паводле правілаў абавязковага страхаваньня ўдзельнікі здарэньня абавязаныя абмяняцца зьвесткамі. Пацярпелы зацікаўлены ў праверцы дакумэнтаў у вінаватага.
ГЛЯДЗІЦЕ ТАКСАМА: У ДТЗ на трасе пад Быхавам сямёра пацярпелых, трое дзяцей у рэанімацыі