У Беларусі ўзброілі ахову калёніяў і дазволілі кіраўнікам папраўчых установаў праводзіць спэцыяльныя апэрацыі

Намесьнік міністра ўнутраных справаў, камандуючы ўнутранымі войскамі Беларусі Мікалай Карпянкоў заявіў аб узбраеньні варты, каб «супрацьдзейнічаць тэрарыстам».

«Яшчэ адзін наш рашучы крок, падтрыманы міністрам унутраных справаў: ува ўсіх папраўчых установах варта дадаткова ўзброеная і прайшла дадатковую падрыхтоўку для эфэктыўнага супрацьдзеяньня тэрарыстам», — сказаў Мікалай Карпянкоў у інтэрвію выданьню sb.by.

Паводле яго, гэта зрабілі з улікам падзеяў у папраўчай калёніі ў жніўні 2024 году ў Валгаградзкай вобласьці Расеі (тады чацьвёра зьняволеных захапілі закладнікаў, пры штурме разам з злачынцамі загінулі таксама супрацоўнікі калёніі. — РС).

«Мы надалі права начальніку варты на чале з кіраўніком папраўчай калёніі праводзіць спэцыяльную апэрацыю для вызваленьня закладнікаў. У рыхтаваньні вартаў удзельнічалі інструктары САХРу, якія маюць вялікі досьвед, так што байцы і афіцэры гатовыя да неадкладных дзеяньняў. Менавіта хуткасьць рэагаваньня на сытуацыю прыносіць посьпех. Апроч таго, навучаныя і гатовы да спэцапэрацыяў вызваленьня закладнікаў і канвоі спэцыяльных вагонаў для перавозкі асобаў, узятых пад варту», — паведаміў Мікалай Карпянкоў.

У аснове «народнага апалчэньня» — мужчыны 60-70 гадоў

Мікалай Карпянкоў таксама расказаў, як рыхтуецца «народнае апалчэньне».

«Цяпер мы актыўна рыхтуем „народнае апалчэньне“. Ахвочых сотні, але для арганізацыі ўпарадкаванай сыстэмы рыхтаваньня апалчэнцы павіны быць разьмеркаваныя па падразьдзелах, і могуць быць набраныя толькі 150-200 чалавек. Гэта сур’ёзныя мужыкі, якія служылі ў Савецкай арміі ў 70–80-я гады. Яны так моцна матываваныя, настолькі гатовыя абараняць свой дом, сваю сям’ю, дзяцей, унукаў, Радзіму, што пасьля кожнага занятку гавораць інструктарам з спэцпрызначэньня: „Калі наступны збор? І дайце нам, калі ласка, пабольш патронаў“. Людзі бачаць, што адбылося ў Курскай вобласьці, іх ня трэба агітаваць», — сказаў ён.

Калі лічыць, што мужчынам на момант пачатку службы ў Савецкай арміі было 18 гадоў, то аснову «народнага апалчэньня» складаюць мужчыны ўзростам ад 63 гадоў і старэйшыя.