У Літве дапускаюць магчымасьць скасаваць забарону на разьмяшчэньне ў краіне ядзернай зброі

Пра гэта паведамляе партал Delfi.

«Мы лічым, што неабходна ацаніць магчымасьці ўнясеньня зьменаў у артыкул 137 Канстытуцыі Літоўскай Рэспублікі, калі нашы саюзьнікі прапануюць пэўныя рэальныя пляны разьмяшчэньня ядзернай зброі або яе кампанэнтаў у Літве, а таксама перагледзець іншыя абавязацельствы», — сказала міністар.

Паводле артыкулу 137 Канстытуцыі Літвы, «на тэрыторыі Літоўскай Рэспублікі ня можа быць зброі масавага паражэньня і вайсковых базаў замежных дзяржаў».

Паводле слоў Шакалене, на гэты момант афіцыйных прапаноў ад партнэраў не паступала, аднак краіна павінная быць гатовая да прыняцьця адпаведных рашэньняў у выпадку зьмены сытуацыі.

Раней прэзыдэнт Францыі Эманюэль Макрон прапанаваў правесьці «дэбаты аб абароне саюзьнікаў на эўрапейскім кантынэнце» з дапамогай францускіх сілаў ядзернага стрымліваньня

Днямі за разьмяшчэньне амэрыканскай ядзернай зброі ў Польшчы выказваўся прэзыдэнт Польшчы Анджэй Дуда. На ягоную думку, гэта стала б фактарам стрымліваньня. Ён ужо неаднаразова выказваўся за пашырэньне праграмы Nuclear Sharing.

Зараз у межах праграмы Nuclear Sharing амэрыканская тактычная ядзерная зброя разьмешчаная ў Бэльгіі, Італіі, Нідэрляндах, Нямеччыне і Турэччыне.