Людзей, якія ахвяравалі ў фонд BySol, перасьцярог кіраўнік фонду Андрэй Стрыжак. Ён папрасіў уважліва глядзець на сапраўдны адрас боту.
«Сілавікі спамяць па чатах фальшывым ботам для зваротаў у BySol. Адзіны кантакт нашай гарачай лініі ў Telegram — акаўнт @help_bysol, там працуюць жывыя людзі, якія кансультуюць і падкажуць, што можна зрабіць пры пагрозе вашай бясьпецы».
Стрыжак падкрэсліў, што ініцыятыва «не карыстаецца чат-ботамі ў працы», і заклікаў да пільнасьці.
Раней BySol у сваім тэлеграм-канале папярэдзіў, што «правакатары даюць спасылкі на падстаўныя, падробленыя акаўнты і боты».
Рэдакцыя «Флагштоку» паведаміла пра тое, што заўважыла ў Telegram «фальшывых ботаў для сувязі» і заклікала чытачоў «пазьбягаць і не актывізаваць іх».
«Падобна, яны створаныя спэцслужбамі для дэананімізацыі карыстальнікаў Telegram, якія жадаюць даслаць інфармацыю рэдакцыі „Флагштоку“. Адзіны канал для сувязі — акаўнт @fuckshtok», — адзначыла рэдакцыя, падкрэсьліўшы, што «ботаў не выкарыстоўвае».
Пачынаючы з 2020 году лукашэнкавы сілавікі неаднаразова стваралі фальшывых ботаў і старонкі розных ініцыятываў, фондаў і СМІ. У прыватнасьці так рабілі, каб выяўляць ахвочых ехаць на вайну за Ўкраіну. Пасьля адпраўкі інфармацыі ў фальшывы бот ці на падробленую старонку людзей затрымлівалі.
ГЛЯДЗІЦЕ ТАКСАМА: Чатыры гады турмы настаўніцы, тры гады падлетку. Як і каго каралі за фатаграфаваньне расейскай вайсковай тэхнікі ГЛЯДЗІЦЕ ТАКСАМА: Сярод зьвестак, якія ўцяклі з бота «Беларускага гаюна», былі ўнікальныя ID карыстальнікаў Тэлеграм