Фінляндыя вылучыла Ўкраіне новы пакет вайсковай дапамогі. Гэта 27-ы транш ад пачатку поўнамаштабнай вайны, яго сума склала 198 млн эўра, паведамляе Мінабароны Фінляндыі.
«Гэты пакет на суму амаль 200 млн эўра быў сфармаваны ў шчыльным супрацоўніцтве з украінцамі. Мы аказваем менавіта тую падтрымку, якая дапамагае Ўкраіне абараняцца ў бягучай вострай сытуацыі на фронце. Нельга аслабляць хватку — наадварот, менавіта цяпер падтрымку неабходна яшчэ больш узмацняць», — заявіў міністар абароны Фінляндыі Анці Хякянэн.
Хякянэн падкрэсьліў, што абмяркоўваў пытаньне дапамогі Ўкраіне з саюзьнікамі са скандынаўскіх краінаў, і ўсе яны сышліся на тым, што «пастаўкі ўзбраеньняў забясьпечваюць права незалежных дзяржаваў на існаваньне і абараняюць чалавечыя жыцьці ва Ўкраіне».
Падрабязнасьці пра зьмест пакету дапамогі не раскрываюцца «для гарантаваньня бясьпечнай дастаўкі».
ГЛЯДЗІЦЕ ТАКСАМА: Заява васьмі паўночных краін: Лукашэнка па-ранейшаму пазбаўлены дэмакратычнай легітымнасьці