Адметнасьцю году, адзначае арганізацыя, стала вялікая колькасьць «схаваных рэпрэсій» — выпадкаў, калі сілавікі патрабуюць ад ахвяр рэпрэсій не раскрываць інфармацыю пра перасьлед.
Разам з тым, паводле зьвестак БАЖ, дакладна вядома, што за год у журналістаў і мэдыя адбыліся 66 вобшукаў. Бязь іх абышлося толькі ў двух месяцах — лютым і жніўні, а максымальная колькасьць выпадкаў прыйшлася на чэрвень (15) і сьнежань (12).
За год было затрымана 27 прадстаўнікоў мэдыя, іх лік за кратамі дасягнуў 45. Зафіксавана больш за 100 выпадкаў «завочнага ціску» на прадстаўнікоў сфэры.
Сыстэмныя рэпрэсіі ў дачыненьні да незалежных СМІ ў Беларусі працягваюцца з 2020 году. Шматлікія рэдакцыі працуюць у выгнаньні. Перад чарговымі выбарамі ўзмацняецца ціск на тых, хто застаўся ў краіне, і тых, хто жыве за мяжой.
19 сьнежня Міністэрства ўнутраных спраў прызнала «экстрэмісцкім фармаваньнем» інфармацыйнае агенцтва «Позірк». Датычнымі да «фармаваньня» назвалі журналістку Тацяну Каравянкову, праваабаронцу Рамана Кісьляка, палітычнага аналітыка Аляксандра Класкоўскага, Пятра Рудкоўскага і Аляксандра Фрыдмана.
2 сьнежня на падставе рашэньня суду Цэнтральнага раёну Менску ў «сьпіс экстрэмісцкіх матэрыялаў» уключаныя акаўнты «Позірку» ў сацыяльных сетках Х і «Інстаграм». 9 сьнежня рашэньне адносна акаўнта агенцтва ў Інстаграме прадубляваў суд Савецкага раёну сталіцы. 20 сьнежня суд Вілейскага раёну надаў адпаведны статус старонцы «Позірку» ў TikTok'у.
ГЛЯДЗІЦЕ ТАКСАМА: Палітзьняволенаму журналісту Ігару Карнею прысудзілі яшчэ 8 месяцаў турмы ГЛЯДЗІЦЕ ТАКСАМА: Большасьць журналістаў у выгнаньні асьцерагаюцца перасьледу з боку рэжыму Лукашэнкі, — апытаньне