У справаздачы НБП прадстаўленыя вынікі апытаньня беларускіх мігрантаў, праведзенага з 15 красавіка па 5 ліпеня 2024 году.
Паводле зьвестак Управы па справах замежнікаў (UdSC) на 30 чэрвеня 2024 году, 133 тысячы беларусаў мелі дазвол на знаходжаньне ў Польшчы.
Згодна з апытаньнем НБП, асноўнай прычынай масавай міграцыі зь Беларусі стала палітычная сытуацыя ў краіне. Амаль 84% апытаных прыехалі ў Польшчу ў 2020 годзе ці пазьней. Каля 60% назвалі прычынай ад’езду палітычную абстаноўку ў Беларусі і страх перад рэпрэсіямі. Другой важнай прычынай міграцыі сталі эканамічныя фактары.
Сярод мігрантаў зь Беларусі значную долю складаюць асобы з польскімі каранямі. Карту паляка ці польскае грамадзянства маюць 24% апытаных.
«Фактар, які адрозьнівае іх ад астатніх імігрантаў зь Беларусі, — гэта перш за ўсё лепшае веданьне польскай мовы, больш стабільны статус знаходжаньня ў Польшчы і больш выгаднае становішча на польскім рынку працы», — адзначаецца ў справаздачы.
Беларускія мігранты — гэта ў асноўным адукаваныя людзі, гаворыцца ў справаздачы.
«Каля 60% заяўляюць, што маюць вышэйшую адукацыю. Сярод апытаных прыкладна роўныя суадносіны мужчын і жанчын. Людзі маладзейшыя за 34 гады складаюць 50% рэспандэнтаў. Амаль палова апытаных знаходзяцца ў Польшчы з мужам ці жонкай», — паведамляе НБП.
Шанцы беларусаў на добрую працу ў Польшчы залежаць ад часу іх прыезду і полу. Беспрацоўнымі ў дасьледаванай выбарцы былі каля 16% рэспандэнтаў. Найлепш на польскім рынку працы адаптаваліся тыя, хто прыехаў да 2019 году і добра валодае польскай мовай. У складанай сытуацыі знаходзіліся тыя, хто прыбыў у 2020–2021 гадах і жанчыны ў цэлым.
Беларуская міграцыя вылучаецца высокім працэнтам работнікаў IT і людзей, якія адкрываюць у Польшчы ўласны бізнэс, адзначаецца ў дасьледаваньні.
Эканамічнае становішча беларускіх мігрантаў адрозьніваецца. Ключавы фактар, які на яго ўплывае, — пол рэспандэнта: жанчыны знаходзяцца ў больш складанай фінансавай сытуацыі.
Беларускія мігранты зьвязваюць сваю будучыню з Польшчай.
«Амаль 79% ацэньваюць сваю задаволенасьць жыцьцём у Польшчы як добрую або вельмі добрую, а 68% плянуюць застацца ў краіне на сталае пражываньне або больш як на год», — гаворыцца ў справаздачы НБП.
Асноўная форма дапамогі, якая магла б аблягчыць знаходжаньне і працу беларускіх мігрантаў у Польшчы, — гэта спрошчаная легалізацыя знаходжаньня (54%). Рэспандэнты з польскімі каранямі чакаюць перш за ўсё дапамогі ў пошуку працы (37%) і спрошчанай легалізацыі (36%).
ГЛЯДЗІЦЕ ТАКСАМА: Аліна Коўшык: Было прынцыпова, каб «Белсатам» кіравалі беларусы, і палякі гэта пачулі ГЛЯДЗІЦЕ ТАКСАМА: Больш за 45 тысяч беларусаў падалі заяву на ДНЖ у Польшчы за 9 месяцаў 2024 году