Пра гэта паведамляе DW.
Міністарка замежных справаў Нямеччыны Анналена Бэрбак падчас восьмага з пачатку поўнамаштабнай вайны візіту ва Ўкраіну паабяцала гэтай краіне дадатковыя 200 мільёнаў эўра ў якасьці дапамогі на наступны зімовы пэрыяд. Гэтыя сродкі будуць выкарыстаныя, у прыватнасьці, для забесьпячэньня палівам украінцаў, якія пражываюць у прыфрантавых раёнах, заявіла яна на сумеснай прэсавай канфэрэнцыі з украінскім калегам Андрэем Сібігам 4 лістапада ў Кіеве.
Украінцы на парозе трэцяй ваеннай зімы павінныя быць забясьпечаныя самым неабходным для абароны ад мінусавых тэмпэратур, падкрэсьліла Бэрбак. Дадатковая гуманітарная дапамога будзе накіравана не на падтрымку энэргетычнага сэктару Ўкраіны, а на меры экстранай зімовай дапамогі насельніцтву.
Па словах Бербак, прэзыдэнт РФ Уладзімір Пуцін, які разьвязаў вайну, цяпер мае падтрымку Паўночнай Карэі, а таксама робіць асабліва жорсткія дзеяньні на ўсходзе Ўкраіны. Ён сьвядома спрабуе разбурыць жыцьцёва важную інфраструктуру, разбамбіць электрастанцыі і разбурыць лініі электраперадач, адзначыла яна. Цяпер разбурана амаль дзьве трэці энэргетычнай інфраструктуры Украіны, нагадала нямецкая міністарка.
Бэрбак запэўніла Украіну ў падтрымцы з боку Нямеччыны
Гаворачы аб маючых адбыцца 5 лістапада выбарах прэзыдэнта ЗША, па выніках якіх у Белы дом можа вярнуцца Дональд Трамп, Бэрбак запэўніла Ўкраіну ў непахіснай падтрымцы з боку Нямеччыны. Нямеччына як найбуйнейшая краіна Эўропы «ўсьведамляе сваю адказнасьць» у гэтым пытаньні, падкрэсьліла яна і заявіла, што хацела яшчэ раз нагадаць аб гэтым у Кіеве напярэдадні выбараў у ЗША.
Кіраўніца МЗС Нямеччыны прызнала, што і ў яе краіне ідуць дыскусіі, якія датычацца дапамогі Кіеву. Ва Ўкраіне яны могуць гучаць «пагрозьліва», таму што тыя, хто ставіць пад пытаньне дапамогу ўкраінцам, блытаюць агрэсара і ахвяру і сумняваюцца ў неабходнасьці падтрымкі міру і свабоды, растлумачыла Бэрбак. Яна таксама нагадала, што ва Ўкраіны ёсьць моцныя сябры і партнэры ва ўсім сьвеце.
Сібіга: Украіна чакае рашэньняў заходніх саюзьнікаў
У сваю чаргу Сібіга заявіў, што Ўкраіна чакае канкрэтных рашэньняў заходніх саюзьнікаў у рамках падтрымкі яго краіны, якая абараняецца ад расейскага ўварваньня. Сярод іншага ён назваў дальнабойныя сыстэмы зброі, дапамогу ў адбіцьці налётаў расейскіх дронаў і ракет, нарошчваньне абароннай вытворчасьці ва Ўкраіне і пастаўкі комплексаў СПА.
«Вельмі важна, каб тыя захады, якія павінны быць прыняты, прымаліся своечасова. Каб мы не дапускалі страты нашых тэрыторый і ня страчвалі нашых людзей, каб мы станавіліся самадастатковымі па некаторых напрамках», — адзначыў ён.
Бэрбак пагутарыла з украінскімі вайскоўцамі
У той жа дзень Бэрбак азнаёмілася з ужываньнем зэнітных самаходных установак Gepard, якія Кіеву перадаў Бэрлін. Украінскія вайскоўцы расказалі ёй пра работу гэтай бранятэхнікі ў баявых умовах і папрасілі аб далейшых пастаўках матэрыялаў і боепрыпасаў.
Нямеччына ўжо паставіла Украіне 55 адзінак Gepard, запасныя часткі і 176 000 боепрыпасаў з запасаў узброеных сілаў Нямеччыны і нямецкай абароннай прамысловасьці.