Кааліцыя палітычных партыяў «Народная Грамада», «Беларуская Хрысьціянская Дэмакратыя» і аргкамітэт стварэньня партыі «Краіна для жыцьця» выступілі з сумесным зваротам, у якім абвясьцілі пра запуск альтэрнатыўнай кампаніі аб’яўленым у Беларусі прэзыдэнцкім выбарам. Выбары ў Беларусі пры Аляксандру Лукашэнку носяць несвабодны і недэмакратычны характар.
Кампанію назвалі «Мой прэзыдэнт сядзіць у турме».
«Заяўленыя на выбары кандыдаты Канапацкая, Гайдукевіч і Лукашэнка могуць гэта рабіць з адной простай прычыны. Сапраўдныя кандыдаты ў прэзыдэнты пасаджаныя імі за краты. Ніводзін з гэтых фрыкаў ня змог бы канкураваць з рэальнымі лідэрамі Беларусі на свабодных выбарах. І яны пра гэта цудоўна ведаюць.
Такіх людзей вельмі шмат, і яны розныя. Многія беларусы маюць такіх аўтарытэтных у іхных вачах людзей, вартых быць першай асобай у Беларусі. І гэта ня толькі Статкевіч, Севярынец, Ціханоўскі ці Бяляцкі, іх шмат. Давайце ж пакажам іх і раскажам пра іх», — заклікаюць ініцыятары кампаніі.
Беларусаў, «якія знаходзяцца ў бясьпецы» (гаворка пра беларусаў замежжа), заклікаюць ладзіць розныя акцыі ў падтрымку зьняволеных беларускіх палітыкаў, грамадзкіх лідэраў і актывістаў, якія, на іх думку, годныя стаць кандыдатамі на прэзыдэнцкіх выбарах у Беларусі.
«Пасты, акцыі, плякаты, майкі з партрэтамі і ўсё, што магчыма для тых беларусаў, хто ў бясьпецы, нас сотні тысяч! Для пачатку — ставім партрэты сваіх лідэраў на асабістыя аватаркі з хэштэгам #мойпрэзыдэнтсядзіцьутурме», — тлумачаць ініцыятары кампаніі.
На думку ініцыятараў кампаніі, такі варыянт «лепшы, чым заклікаць прыходзіць на ўчасткі нават з добрымі намерамі».
«Пакажам, што старонка не перагорнутая і нічога не забыта. Мы памятаем усіх і ўсё!» — адзначаецца ў заяве кааліцыі.
Раней Офіс Сьвятланы Ціханоўскай, Аб’яднаны пераходны кабінэт і Каардынацыйная рада выпусьцілі сумесную заяву, у заклікалі беларусаў галасаваць супраць усіх на прэзыдэнцкіх выбарах 2025 году.
ГЛЯДЗІЦЕ ТАКСАМА: Дэмакратычныя сілы Беларусі заклікалі галасаваць супраць усіх на «бязвыбарах-2025»Выбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Такое рашэньне ўхвалілі на пасяджэньні Палаты прадстаўнікоў 23 кастрычніка. Паводле заканадаўства, сёмыя прэзыдэнцкія выбары ў Беларусі павінны адбыцца не пазьней за 20 ліпеня 2025 году.
- Аляксандар Лукашэнка ўжо заявіў пра намер працягнуць сваю ўладу над краінай яшчэ прынамсі на пяць год. Гэта будуць ужо сёмыя выбары для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Напярэдадні абвяшчэньня даты галасаваньня амбасадар Расеі ў Беларусі Барыс Грызлоў сказаў, што расейскі бок дапаможа Менску ў выпадку «спробаў дэстабілізацыі» ў часе выбараў, калі Беларусь зьвернецца па такую дапамогу.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада выпусьцілі сумесную заяву, у якой падкрэсьлілі, што цяперашняя электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Раней дэмакратычныя сілы Беларусі ўжо неаднаразова заяўлялі, што будуць дабівацца непрызнаньня гэтых выбараў міжнароднай супольнасьцю.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не былі прызнаныя міжнароднай супольнасьцю, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі.
- Палітычны крызіс, які ўзьнік пасьля выбараў 2020 году ў Беларусі, і шырокамаштабныя рэпрэсіі ў краіне працягваюцца да гэтага часу.
- У турмах Беларусі застаецца каля 1,3 тысячы чалавек, якіх праваабаронцы прызналі палітвязьнямі (колькасьць асуджаных з палітычных матываў значна большая). З 2020 году праваабарончаму цэнтру «Вясна» вядомыя прозьвішчы сама меней 7400 фігурантаў крымінальных палітычных спраў у Беларусі, заведзеных з палітычных матываў. Зь іх 6013 чалавек ужо асудзілі (як мінімум 2336 чалавек — на пазбаўленьне волі, 681 — на «хімію»). Больш за 50 тысяч чалавек затрымлівалі з палітычных матываў.
- У сувязі з пагрозай палітычнага перасьледу Беларусь пасьля 2020 году, паводле розных ацэнак, пакінулі сотні тысяч беларусаў: сацыёляг Генадзь Коршунаў у траўні 2024-га ацэньваў маштаб палітычнай эміграцыі ў 500-600 тысяч чалавек, намесьнік кіраўніка МУС Карпянкоў у кастрычніку 2023 году казаў, што з 2020 году зь Беларусі зьехалі 350 тысяч чалавек.
- У Беларусі ліквідавалі амаль амаль усе палітычныя партыі, засталіся толькі 4 праўладныя партыі. Агулам грамадзкі сэктар краіны, пачынаючы з пасьлявыбарчага пэрыяду 2020 году, страціў ужо сама меней 1838 некамэрцыйных арганізацыяў (сярод іх грамадзкія аб’яднаньні, прафсаюзы, палітычныя партыі, фонды, недзяржаўныя ўстановы, асацыяцыі, рэлігійныя арганізацыі і інш.).
- Пасьля выбараў 2020 году ў Беларусі прызналі «экстрэмісцкімі фармаваньнямі/арганізацыямі» і заблякавалі практычна ўсе незалежныя СМІ, журналісты гэтых мэдыя сутыкнуліся з затрыманьнямі, арыштамі, ператрусамі, адміністрацыйным і крымінальным перасьледам, многія вымушана пакінулі краіну і працягнулі працаваць з-за мяжы. За кратамі ў Беларусі цяпер застаюцца 36 прадстаўнікоў мэдыя.