Басманны суд Масквы падоўжыў тэрмін утрыманьня пад вартай грамадзяніну Беларусі Сяргею Ерамееву, паведамляе ТАСС са спасылкай на прэс-службу суду. Беларуса абвінавачваюць у падрыве двух цягнікоў на Байкала-Амурскай магістралі ў Бураціі.
Сяргей Ерамееў застанецца пад арыштам яшчэ на тры месяцы.
51-гадовага беларуса Сяргея Ерамеева затрымалі ў сьнежні 2023 году ў Омску і абвінавацілі ў падрыве двух цягнікоў на Байкала-Амурскай магістралі ў Бураціі. У паведамленьнях, якія давала расейскае ФСБ, Ерамееў казаў, што хацеў паралізаваць перавоз вайсковай тэхнікі бліжэй да Ўкраіны. Расейскія спэцслужбы сьцьвярджалі, што выбухоўку Ерамееў атрымаў яшчэ ў Беларусі, а потым перавёз яе на Далёкі Ўсход Расеі.
Пра Сяргея Ерамеева вядома, што ён працаваў на «Нафтане», а ў 2020 годзе далучыўся да пратэстаў. Цяпер ён зьняволены ў СІЗА «Лефортава» ў Маскве.
Беларусу прад’явілі абвінавачаньне паводле ч. 2 арт. 205 Крымінальнага кодэксу РФ (тэрарыстычны акт).
У пачатку 2024 году стала вядома, што мужчыну вазілі на сьледчыя дзеяньні ў Беларусь. Дзяржаўны тэлеканал апублікаваў прапагандысцкі сюжэт пра нібыта дзейнасьць у Беларусі агентаў украінскіх спэцслужбаў, у якім у тым ліку паказалі Сяргея Ерамеева. У стужцы АНТ сьцьвярджаецца, што Ерамееў атрымаў выбухоўку ад ўкраінскіх спэцслужбаў.
Раней паведамлялі, што да Ерамеева не пускаюць адваката.
ГЛЯДЗІЦЕ ТАКСАМА: Да беларуса, якога затрымалі за падрывы цягнікоў на БАМе, не пускаюць адваката ГЛЯДЗІЦЕ ТАКСАМА: Падрыў цягнікоў на БАМе, падпал электрастанцыі. Як беларусы ўдзельнічаюць у антываенным супраціве ў Расеі