Пэрсанальныя зьвесткі сяброў камісіі на маючых адбыцца прэзыдэнцкіх выбарах публікавацца ня будуць зь меркаваньняў бясьпекі. Пра гэта расказаў кіраўнік Цэнтравыбаркаму Ігар Карпенка.
«Адносна бясьпекі нагадаю, што мы ня будзем публікаваць пэрсанальныя зьвесткі сяброў камісій. Але гэта ня значыць, што гэтыя людзі будуць безназоўнымі. Яны будуць працаваць на ўчастках, у іх будуць бэджы. Можна зьвярнуцца ў выпадку нейкіх пытаньняў да гэтых людзей. Але мы ня будзем друкаваць агульныя сьпісы, — адзначыў Ігар Карпенка.
Кіраўнік ЦВК дадаў, што „з гэтай нагоды крыкаў вельмі шмат было, асабліва за мяжой“, цытуе Карпенку праўладная прэса.
Утойваньне імёнаў сяброў выбарчых камісій — не навіна. Сьпісы выбарчых камісій не публікаваліся і на рэфэрэндуме па Канстытуцыі, які прайшоў у лютым 2022 году.
У той раз ЦВК спачатку патлумачыў такое рашэньне „клопатам аб бясьпецы“, а пасьля — „абаронай пэрсанальных зьвестак“.
ГЛЯДЗІЦЕ ТАКСАМА: У ЦВК паведамілі, што за мяжой выбарчых участкаў ствараць ня будуцьВыбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Такое рашэньне ўхвалілі на пасяджэньні Палаты прадстаўнікоў 23 кастрычніка. Паводле заканадаўства, сёмыя прэзыдэнцкія выбары ў Беларусі павінны адбыцца не пазьней за 20 ліпеня 2025 году.
- Аляксандар Лукашэнка ўжо заявіў пра намер працягнуць сваю ўладу над краінай яшчэ прынамсі на пяць год. Гэта будуць ужо сёмыя выбары для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Напярэдадні абвяшчэньня даты галасаваньня амбасадар Расеі ў Беларусі Барыс Грызлоў сказаў, што расейскі бок дапаможа Менску ў выпадку «спробаў дэстабілізацыі» ў часе выбараў, калі Беларусь зьвернецца па такую дапамогу.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада выпусьцілі сумесную заяву, у якой падкрэсьлілі, што цяперашняя электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Раней дэмакратычныя сілы Беларусі ўжо неаднаразова заяўлялі, што будуць дабівацца непрызнаньня гэтых выбараў міжнароднай супольнасьцю.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не былі прызнаныя міжнароднай супольнасьцю, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі.
- Палітычны крызіс, які ўзьнік пасьля выбараў 2024 году ў Беларусі, і шырокамаштабныя рэпрэсіі ў краіне працягваюцца да гэтага часу.
- На 23 кастрычніка ў турмах Беларусі застаецца 1300 чалавек, якіх праваабаронцы прызналі палітвязьнямі (колькасьць асуджаных з палітычных матываў значна большая). З 2020 году праваабарончаму цэнтру «Вясна» вядомыя прозьвішчы сама меней 7400 фігурантаў крымінальных палітычных спраў у Беларусі, заведзеных з палітычных матываў. Зь іх 6013 чалавек ужо асудзілі (як мінімум 2336 чалавек — на пазбаўленьне волі, 681 — на «хімію»). Больш за 50 тысяч чалавек затрымлівалі з палітычных матываў. Сотні тысяч чалавек зьехалі зь Беларусі ў іншыя краіны.