У Менску адбылося пасяджэньне супольнай калегіі міністэрстваў абароны Беларусі і Расеі, для ўдзелу ў якой у Беларусь прыбыў міністар абароны Расеі Андрэй Белавусаў.
«З 2018 году гэта першае пасяджэньне на тэрыторыі Беларусі ў вочным фармаце. У часе пасяджэньня плянуюць абмяняцца думкамі і ўхваліць рашэньні па важных пытаньнях супольнай абароннай палітыкі, пашырэньні вайсковага супрацоўніцтва паміж узброенымі сіламі на карысьць вайсковай бясьпекі саюзнай дзяржавы», — напісана ў афіцыйным паведамленьні.
Адкрываючы пасяджэньне, міністар абароны Беларусі Віктар Хрэнін заявіў, што «інтэграцыя ў справе гарантаваньня бясьпекі саюзнай дзяржавы адыграе вырашальную ролю».
«У гэты складаны пэрыяд глябальнага супрацьстаяньня паміж Захадам і Ўсходам мы працягваем падтрымліваць дасягнуты ўзровень супрацоўніцтва, яго далейшае разьвіцьцё і паглыбленьне ў інтарэсах захаваньня сувэрэнітэту і незалежнасьці нашых дзяржаў. Супольнае вырашэньне задач у вайсковай сфэры зьяўляецца асновай стабільнасьці ня толькі нашых краіны, але і важным чыньнікам стратэгічнага стрымліваньня пагроз для Арганізацыі дамовы аб калектыўнай бясьпецы», — заявіў Віктар Хрэнін.
Віктар Хрэнін паведаміў, што генэральныя штабы Ўзброеных сіл Беларусі і Расеі пачалі рыхтавацца да правядзеньня вучэньняў «Захад-2025», якія будуць галоўнай падзеяй у супольнай падрыхтоўцы органаў ваеннага кіраваньня і войскаў у наступным годзе. На пасяджэньні зацьвердзілі задумку гэтых вучэньняў, а таксама плян супрацоўніцтва, які прадугледжвае больш за 160 супольных мерапрыемстваў.
У 2022 годзе пасьля вучэньняў «Захад», якія адбываліся ў Беларусі, Расея пачала ваеннае ўварваньне ва Ўкраіну.
У сваю чаргу Сяргей Белавусаў заявіў, што супрацоўніцтва зь Беларусьсю «асаблівае важнае ва ўмовах адкрытага ціску з боку калектыўнага Захаду».
«Павелічэньне ўцягнутасьці краін Захаду ў канфлікт ва Ўкраіне стварае глябальныя рызыкі. Імкненьне нанесьці максымальную шкоду Расеі можа прывесьці да наўпроставага ваеннага сутыкненьня ядзерных дзяржаў. Мы ня можам не рэагаваць на гэтыя пагрозы», — сказаў расейскі міністар.
Паводле яго, Беларусь і Расея працягваюць фарміраваць адзіную абаронную прастору.
22 кастрычніка расейскі амбасадар Барыс Грызлоў паведаміў, што Расея і Беларусьі рыхтуюцца да падпісаньня двухбаковай дамовы аб гарантыях бясьпекі і абноўленай канцэпцыі бясьпекі саюзнай дзяржавы.
ГЛЯДЗІЦЕ ТАКСАМА: Амбасадар Грызлоў заявіў, што Масква дапаможа Лукашэнку ліквідаваць «беспарадкі» на прэзыдэнцкіх выбарах 2025 года