Сыстэма не пачне працаваць 10 лістапада, як плянавалася, паведаміла журналістам кіраўніца камісіі ўнутраных справаў ЭЗ Ільва Югансан. Новага графіку пакуль няма, але разглядаецца магчымасьць паэтапнага ўвядзеньня, дадала яна.
Сыстэма ўезду/выезду (EES) мусіць стварыць лічбавы запіс, які зьвязвае праязны дакумэнт з біямэтрычнымі зьвесткамі, якія пацьвярджаюць асобу, а таму ня будзе патрэбы ўручную ставіць штамп у пашпарце на вонкавай мяжы ЭЗ.
Але ад грамадзян краін, якія не ўваходзяць у ЭЗ, што прыбываюць у Шэнгенскую зону свабоднага перамяшчэньня, спатрэбяцца рэгістрацыя адбіткаў пальцаў, сканаваньне твару і адказы на пытаньні наконт месца іх знаходжаньня.
Прадстаўнік Міністэрства ўнутраных справаў Нямеччыны заявіў, што тры краіны, на якія прыпадае 40% патоку пасажыраў, не гатовыя ўвесьці EES, бо «яшчэ не дасягнутыя неабходная стабільнасьць і функцыянальнасьць» цэнтральнай сыстэмы EES, якую забясьпечвае агенцтва ўкараненьня ІТ-сыстэм у Эўразьвязе. Міністэрства ўнутраных справаў Францыі заявіла, што, хоць Францыя перакананая ў карыснасьці EES, яе ўкараненьне трэба належна падрыхтаваць.
Запуск EES быў заплянаваны на 2022 год, аднак ня раз зрываўся праз тэхнічныя праблемы і затрымкі з усталяваньнем аўтаматызаваных бар’ераў на ўсіх міжнародных сухаземных, морскіх і паветраных межах Шэнгенскай зоны.
Раней паведамлялі, што Эўрапейскі Зьвяз з 10 лістапада ўводзіць новыя правілы ўезду ў краіны Шэнгенскай зоны. Пры першым уезьдзе ў грамадзян будуць прымаць біямэтрычныя зьвесткі: адбіткі пальцаў і фота твару. Зьвесткі будуць захоўвацца тры гады, паўторна іх здаваць ня трэба. Гэтыя захады павінны спрасьціць перасячэньне мяжы, перадухіліць выкарыстаньне падробленых пашпартоў і процідзейнічаць нелегальнай міграцыі.
ГЛЯДЗІЦЕ ТАКСАМА: Польшча ўскладняе візавыя правілы пасьля карупцыйнага скандалу. Гэта датычыць і гуманітарных візаў