Зь Менску паступае інфармацыя аб пагаршэньні якасьці вады. Як паведамляе дзяржаўнае прадпрыемства Менскводаканал, пасьля аднаўленьня водазабесьпячэньня аварыйнымі брыгадамі ў праблемных раёнах гораду адразу арганізавалі прамываньне асобных участкаў сетак водазабесьпячэньня.
Камунальнікі адзначаюць, што вядзецца пастаянны «маніторынг якасьці з правядзеньнем рэглямэнтальных работ». Улады абяцаюць вырашыць праблему.
26 верасьня ў трох раёнах Менску ўзьніклі праблемы з водазабесьпячэньнем. Прычына ў пашкоджаньні магістральнага вадаводу, паведамілі ў «Менскводаканале».
ГЛЯДЗІЦЕ ТАКСАМА: У трох раёнах Менску — перабоі з вадой«У сувязі з пашкоджаньнем магістральнага вадаводу дыямэтрам 1000 мм назіраецца зьніжэньне ціску, адсутнасьць і пагаршэньне якасьці водазабесьпячэньня ў Кастрычніцкім, Заводзкім і Ленінскім раёнах Менску», — гаворыцца ў паведамленьні «Менскводаканалу».
«Менскводаканал» арганізаваў падвоз вады ва ўсе лякарні пацярпелых раёнаў сталіцы.
Варта адзначыць, што гэта ня першыя перабоі з вадой у Менску за апошнія гады. Часам, доўга чакаючы дапамогі ад дзяржавы, падвоз вады ў праблемныя раёны арганізоўвалі самі грамадзяне.
ГЛЯДЗІЦЕ ТАКСАМА: У Менску праблемы зь пітной вадой. Улады рэкамэндуюць часова не карыстацца водаправодам