24 верасьня галоўнае ўпраўленьне выведкі Мінабароны Ўкраіны паведаміла пра вызваленьне ад акупацыі расейскімі войскамі агрэгатнага заводу ў горадзе Ваўчанск на Харкаўшчыне. У апэрацыі ўдзельнічалі падразьдзяленьні беларускіх добраахвотнікаў.
Паведамляецца, што «ў выніку надзвычай складанай і пасьпяховай апэрацыі» ўдалося зьнішчыць акупантаў і цалкам вызваліць тэрыторыю Ваўчанскага агрэгатнага заводу (усе 30 будынкаў). Таксама падчас апэрацыі байцам удалося ўзяць палонных для далейшага абмену палоннымі.
Удзел у вызваленчай апэрацыі ўзялі спэцыяльныя групы галоўнага ўпраўленьня выведкі Мінабароны Ўкраіны: «Стугна», «Парагон», РДК, «Юнгер», БДК, «Тэрор», гаворыцца ў паведамленьні. Апошнія два, Беларускі добраахвотніцкі корпус (БДК) і «Тэрор», — беларускія падразьдзяленьні добраахвотнікаў.
Яны вялі кантактныя баі з расейскімі вайскоўцамі «ва ўмовах шчыльнай забудовы», часам уступаючы зь імі ў рукапашны бой, гаворыцца ў паведамленьні. Пры гэтым расейскія вайскоўцы бесьперапынна выкарыстоўвалі супраць іх «значную колькасьць артылерыі, ударных дронаў-камікадзэ, кіраваных авіябомбаў і цяжкія агнямётныя сыстэмы „Сонцапёк“».
- Ваўчанскі агрэгатны завод — галоўны стратэгічны аб'ект у горадзе Ваўчанску Харкаўскай вобласьці, які расейцы захапілі ў траўні падчас наступу на Харкаўшчыне.
- На пачатку траўня 2024 году расейцы пайшлі ў паўторны наступ на поўначы Харкаўскай вобласьці. Тады ж расейскія войскі пачалі атачаць Ваўчанск, горад з даваенным насельніцтвам амаль у 17 тысяч чалавек.
- У жніўні Ўзброеныя сілы Ўкраіны заяўлялі, што расейскія вайскоўцы застаюцца заблякаванымі на заводзе ўжо некалькі месяцаў.
- На пачатку верасьня ўкраінскія вайскоўцы расказвалі, што Ваўчанск цяпер амаль цалкам разбураны, а ад удараў артылерыі і FPV-дронаў выгараюць вуліцы, горад пакрыты дымам.
- Апошнім часам Сілам абароны Ўкраіны ўдалося спыніць прасоўваньне расейскіх войскаў на Харкаўшчыне, Расея адвяла частку войскаў з Харкаўскай вобласьці на Курскі напрамак. Аднак баі на гэтым напрамку працягваюцца ў населеных пунктах Глыбокае і Ваўчанск.