Пра выбухі паведамляе Reuters са спасылкай на крыніцу ў органах бясьпекі.
Афіцыйны прадстаўнік «Хэзбалы», які гаварыў на ўмовах ананімнасьці, сказаў, што дэтанацыя пэйджараў стала «найбуйнейшым парушэньнем бясьпекі» за апошні год. У выніку дэтанацыі пэйджара пацярпеў таксама пасол Ірану ў Лібане Моджтаба Амані.
Па папярэдніх дадзеных, загінулі восем чалавек. Каля трох тысяч атрымалі раненьні. Колькі зь іх удзельнікі групоўкі, не ўдакладняецца.
IMPORTANT 🚨This is a developing story, and all information is preliminary, with numbers and info subject to change.Roughly an hour ago, Hezbollah’s encrypted pager devices began simultaneously, exploding across Lebanon, including in Damascus. Initial reports from Lebanon… pic.twitter.com/pWpDePcFUv
— Open Source Intel (@Osint613) September 17, 2024
Ynet піша, што рацыі і пэйджары, якімі групоўка пачала карыстацца замест смартфонаў, былі падарваныя дыстанцыйна.
Міністэрству аховы здароўя даручана мабілізаваць рэсурсы для аказаньня дапамогі пацярпелым. Ведамства заклікае грамадзян не карыстацца бесправаднымі прыладамі.
Паводле дадзеных дзяржаўнага лібанскага агенцтва NNA, выбухі былі ня толькі на поўдні Бэйруту, але і ў іншых рэгіёнах краіны. ВВС са спасылкай на крыніцы ў лібанскіх службах бясьпекі піша, што пэйджары, якія члены «Хэзбалы» выкарыстоўваюць для сувязі, былі ўзламаныя ізраільскімі спэцслужбамі.
Ізраіль пакуль не камэнтаваў паведамленьняў пра дэтанацыю пэйджараў.
Армія абароны Ізраілю (ЦАХАЛ) у адказ на абстрэлы з боку «Хэзбалы» наносіць удары па тэрыторыі Лібану. ЦАХАЛ неаднаразова папярэджваў, што можа пачаць ваенную апэрацыю. Ізраільскія вайскоўцы раней зацьвердзілі апэратыўныя пляны наступу ў Лібане.
Вайна Ізраілю з ХАМАСам. Асноўнае
- 7 кастрычніка Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
- Ахвяры: па стане на 19 лютага 2024 году каля 1160 чалавек у Ізраілі, у асноўным мірных жыхароў, паводле зьвестак AFP на падставе ізраільскіх лічбаў. Баевікі ў першы дзень вайны захапілі каля 250 закладнікаў, 130 зь якіх застаюцца ў Газе, у тым ліку 30 меркавана загінуўшых, паводле зьвестак Ізраіля.
Міністэрства аховы здароўя Газы паведамляе, што ў выніку ізраільскай ваеннай кампаніі загінулі як мінімум 28 985 чалавек, пераважна жанчыны і дзеці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.