27 жніўня Апэляцыйны суд Сэрбіі разгледзеў скаргу беларускага рэжысэра Андрэя Гнёта на рашэньне аб экстрадыцыі, паведамляе Балканская служба Радыё Свабода.
Скарга на рашэньне Найвышэйшага суду ў Бялградзе была пададзеная 18 чэрвеня.
Рашэньне пакуль невядомае. Як спадзяецца абарона беларуса, яго абвесьцяць у наступныя 3-4 тыдні. У суда «ёсьць законны тэрмін 30 дзён для прыняцьця рашэньня аб ягонай экстрадыцыі ў Беларусь», паведамляе мясцовы партал N1.
«Маім галоўным пасланьнем было прасіць суд падумаць, маючы вялікія абавязкі, пра тое, што кепскае рашэньне можа зьнішчыць ня толькі жыцьцё адной асобы (маё), але й жыцьцё маіх сваякоў і сяброў», — сказаў Андрэй Гнёт пасьля паседжаньня.
ГЛЯДЗІЦЕ ТАКСАМА: Кампанію ў абарону Андрэя Гнёта падтрымалі Сьвятлана Алексіевіч, Алег Сянцоў, Жульет Бінош, Кен Лоўч, Агнешка Голянд«Праз два месяцы маруднага чаканьня і цемры апэляцыйны суд Сэрбіі прызначыў дату слуханьняў. Гэта ня проста дзень, гэта мой апошні шанец быць пачутым. Лёс усёй маёй будучыні ў адным кроку ад катастрофы, і менавіта зараз мне як ніколі патрэбная вашая падтрымка», — напісаў раней Гнёт у сацыяльных сетках.
Паводле словаў Андрэя Гнёта, дзесяць месяцаў арышту, сем зь якіх ён правёў у цэнтральнай турме Бялграду, былі бясконцым кашмарам.
«Нягледзячы на гэта, я не здаюся, — падкрэсліў Гнёт. — Амаль год адчайнай барацьбы, і вось нарэшце мае адвакаты і я зможам выступіць у судзе, каб сказаць сваё слова. Гэта нашая апошняя магчымасьць выратаваць маё жыцьцё».
На думку рэжысэра, цяпер зразумела, што толькі аб’яднаньне намаганьняў, «палітычны і мэдыйны ціск» змаглі зрушыць яго справу зь мёртвага пункту.
- 41-гадовы Гнёт — рэжысэр тэлерэклямы і музычных кліпаў, журналіст і сузаснавальнік аб’яднаньня SOS.by, прызнанага ў Беларусі «экстрэмісцкім фармаваньнем». Працаваў зь вядомымі брэндамі, сярод якіх МТС, Mark Formelle, «Бульбаш», «Аліварыя», «Спартак», «Беллакт», World of Tanks.
- Яго затрымала 30 кастрычніка 2023 году памежная служба Сэрбіі пасьля прылёту ў Бялград, прычына — знаходжаньне ў міжнародным вышуку на запыт беларускага бюро Інтэрполу ад 21 верасьня 2023 году.
- Праваабаронцы і адвакат Гнёта настойваюць, што яго перасьледуюць з палітычных, а не эканамічных матываў, як сузаснавальніка SOS.by.
- 31 траўня 2024 году суд у Бялградзе пастанавіў, што патрабаваньне выдаць Гнёта беларускім праваахоўным органам законнае і павінна быць задаволенае «ў мэтах яго прыцягненьня да крымінальнай адказнасьці па абвінавачаньні ва ўчыненьні крымінальнага злачынства паводле ч. 2 арт. 243 Крымінальнага кодэксу (ухіленьне ад выплаты падаткаў)».
- Рашэньне Гнёт і яго адвакат атрымалі 13 чэрвеня і падалі апэляцыю.
- Цяпер рэжысэр знаходзіцца ў Бялградзе пад хатнім арыштам.