Аляксандар Лукашэнка ў інтэрвію тэлеканалу «Россия» адказаў на пытаньне, ці гатовы ён ужыць ядзерную зброю.
Пра гэта паведамляе БЕЛТА.
Прадстаўнік каналу Яўгеній Папоў спытаў: «Прамое пытаньне, якое вельмі любяць на Захадзе лідэрам задаваць: вы гатовы націснуць „чырвоную кнопку“?».
«Наконт ядзернай зброі: слухай, „чырвоныя кнопкі“ ўжо вакол панаціскалі. Па пэрымэтры Беларусі і Расеі ўжо панаціскалі чырвоныя гэтыя кнопкі. Засталося толькі „самую чырвоную“ націснуць. Таму ў маральных адносінах, напэўна, нам з Пуціным, прымаючы такія рашэньні, дык нават ужо неяк і няёмка аб гэтым гаварыць», — заявіў Лукашэнка.
«Па-другое, калі тут зьявілася тактычная ядзерная зброя, я ім [апанэнтам за мяжой] наўпрост сказаў (хоць яны там і гавораць: дурны, ужыве зброю): «Мы не зьбіраемся ніякай зброі ўжываць, пакуль вы не наступіце на нашую дзяржаўную мяжу. Яна ж — мяжа нашай саюзнай дзяржавы», — адзначыў Лукашэнка.
Ён нагадаў, што Расея, згодна з існуючымі дамоўленасьцямі, у выпадку агрэсіі адносна Беларусі ўвядзе ў краіну свае падразьдзяленьні, каб аказаць ваенную падтрымку.
ГЛЯДЗІЦЕ ТАКСАМА: Рэтрансьлятар Пуціна. Навошта Лукашэнка зноў пужае сьвет ядзернай зброяй- Галоўнакамандуючы УСУ Аляксандар Сырскі 15 жніўня заявіў, што ўкраінскія вайскоўцы кантралююць у Курскай вобласьці 82 населеныя пункты на плошчы 1150 квадратных кілямэтраў. Пра гэта ён сказаў на пасяджэньні стаўкі вярхоўнага галоўнакамандуючага. Расея пакуль не камэнтавала гэтую інфармацыю.
- Сырскі сьцьвярджае, што ўкраінскае войска прасунулася ўглыб рэгіёну на 35 кілямэтраў. На кантраляванай украінскімі вайскоўцамі тэрыторыі створаная ўкраінская камэндатура, якою будзе кіраваць генэрал-маёр Эдуард Маскалёў, сказаў Сырскі. Паводле ягоных слоў, такое рашэньне прынятае «для захаваньня правапарадку і забесьпячэньня першачарговых патрэбаў насельніцтва».
- 6 жніўня ўкраінскія войскі перасеклі дзяржаўную мяжу Расеі — пачаўся наступ УСУ ў Курскай вобласьці. У рэгіёне ўведзены рэжым надзвычайнай сытуацыі фэдэральнага маштабу. Увогуле з прымежных раёнаў эвакуаваныя звыш 120 тысяч чалавек. Больш за дзьве тысячы жыхароў амаль тыдзень не выходзяць на сувязь. У чацьвер, 15 жніўня, рэжым НС фэдэральнага ўзроўню абвясьцілі і ў Белгарадзкай вобласьці. Там таксама праходзіць эвакуацыя насельніцтва.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.