Армэнія ня будзе ўдзельнічаць у вайсковых вучэньнях Арганізацыі дамовы аб калектыўнай бясьпецы (АДКБ), якія адбудуцца 12–16 жніўня ў Расеі і 3–15 верасьня — у Кыргызстане.
Як адзначаецца на афіцыйным сайце арганізацыі, у вучэньнях на палігоне «Горны» Сібірскай акругі Расейскай гвардыі ў Новасібірскай вобласьці возьмуць удзел Расея, Беларусь, Казахстан, Таджыкістан і Кыргызстан.
Гэтыя вучэньні маюць умоўную назву «Кобальт-2024». У іх возьмуць удзел спэцпадразьдзелы органаў унутраных спраў, нацыянальнай бясьпекі, унутраных войскаў, спэцыяльных і антынаркатычных службаў, а таксама аварыйна-выратавальных і супрацьпажарных структураў, якія ўваходзяць у склад фармаваньняў сілаў спэцыяльнага прызначэньня Калектыўных сілаў апэратыўнага рэагаваньня АДКБ.
На вучэньнях у Новасібірскай вобласьці будуць трэнаваць навыкі нэўтралізацыі бандаў і тэрарыстычных груповак, а таксама перакрыцьця каналаў кантрабанды наркотыкаў.
У Кыргызстане пройдуць камандна-штабныя вучэньні «Узаемадзеяньне-2024», «Пошук-2024» і «Эшалён-2024». У іх таксама будуць удзельнічаць падразьдзелы з Расеі, Беларусі, Казахстану, Таджыкістану і Кыргызстану.
Усе вучэньні праводзяцца паводле пляну супольнай падрыхтоўкі органаў кіраваньня і фармаваньняў сілащ і сродкаў сыстэмы калектыўнай бясьпекі АДКБ.
У часе вучэньняў у Крыгызстане будуць трэнавацца ў арганізацыі супрацьпаветранага прыкрыцьця і выкарыстаньня сілаў і сродкаў радыёэлектронанй барацьбы пры ўзаемадзеяньні з выведна-ўдарнымі бесьпілётнікамі.
Што папярэднічала
Армэнія ўдзельнічае ў Арганізацыі дамовы аб калектыўнай бясьпецы (АДКБ), але зь сярэдзіны 2023 году пачала згортваць сваю прысутнасьць там.
У лютым 2024 году прэм’ер-міністар Нікол Пашыньян прызнаў, што Армэнія, у сутнасьці, замарозіла ўдзел у арганізацыі, бо тая «ня выканала сваіх абавязаньняў у галіне бясьпекі» перад Армэніяй, асабліва ў 2021 і 2022 гадах. У жніўні 2024 году расейскія памежнікі пакінулі міжнародны аэрапорт Ерэвану.
12 чэрвеня прэм’ер-міністар Армэніі Нікол Пашыньян на сустрэчы з дэпутатамі парлямэнту заявіў, што краіна выйдзе з АДКБ. Пры гэтым канкрэтных тэрмінаў выхаду ён не назваў. «Мы самі вырашым, калі выйдзем», — дадаў ён.
Пазьней міністар замежных справаў Армэніі Арарат Мірзаян заявіў у парлямэнце, што словы Пашыньяна няправільна інтэрпрэтавалі.
«Прэм’ер-міністар Армэніі заявіў, што мы вырашым, калі выйдзем, але назад ня вернемся. Калі нехта сьцьвярджае, што прэм’ер-міністар Армэніі заявіў, што Армэнія выходзіць з АДКБ, то памыляецца», — сказаў Мірзаян.
На той жа сустрэчы Нікол Пашыньян заявіў, што ніякія афіцыйныя асобы Армэніі ня будуць наведваць Беларусь, пакуль Аляксандар Лукашэнка знаходзіцца ва ўладзе.
«Адзін з чальцоў АДКБ заяўляе, што ўдзельнічаў у падрыхтоўцы 44-дзённай вайны (у Карабаху), заахвочваў, верыў і жадаў перамогі Азэрбайджану. І пасьля гэтага я павінен абмяркоўваць з кіраўніком Беларусі нейкія пытаньні ў фармаце АДКБ?» — сказаў Пашыньян у парлямэнце.
У выніку бакі адклікалі сваіх дыпляматаў для кансультацыяў.
Экспэрты мяркуюць, што прычынай гэтага мог стаць продаж Азэрбайджану беларускай зброі, якую азэрбайджанскі бок выкарыстоўваў у вайне ў Карабаху ў 2020 годзе.