Выданьне The Telegraph выявіла, што інжынэры атамных падводных лодак Вялікай Брытаніі выкарыстоўваюць праграмнае забесьпячэньне, распрацаванае, у парушэньне правілаў Міністэрства абароны, у Расеі і Беларусі.
Праграмнае забесьпячэньне мелі ствараць брытанскія супрацоўнікі, якія маюць допуск да сакрэтнай інфармацыі, але яго распрацоўка была часткова перададзеная на аўтсорсінг распрацоўнікам у расейскім Томску і ў Менску.
У Брытаніі б’юць трывогу, бо коды, створаныя расейскімі і беларускімі распрацоўнікамі, можна выкарыстаць для раскрыцьця месца знаходжаньня брытанскіх падводных лодак.
Паводле The Telegraph, Міністэрства абароны палічыла гэта сур’ёзнай пагрозай для бясьпекі Вялікай Брытаніі і пачало расьсьледаваньне.
Кампанія Rolls-Royce Submarines, якая абслугоўвае атамны падводны флот Вялікай Брытаніі, хацела мадэрнізаваць сваю ўнутраную сетку для пэрсаналу і перадала гэтую працу на субпадрад WM Reply, лічбавай кансалтынгавай фірме.
WM Reply, у сваю чаргу, выкарыставала распрацоўнікаў зь Беларусі і Расеі.
Расьсьледаваньне паказала, што фірма, якая перадала працу на аўтсорсінг у Расею і Беларусь, першапачаткова трымала гэта ў сакрэце і нават абмяркоўвала, ці зможа яна схаваць месца знаходжаньня распрацоўнікаў, надаўшы ім фальшывыя імёны брытанцаў.
Улетку 2020 году супрацоўнікі WM Reply пачалі біць трывогу наконт наступстваў выкарыстаньня беларускага пэрсаналу для праекту з гледзішча бясьпекі і прапанавалі паінфармаваць Rolls-Royce. На сходзе каманды, стэнаграму якога падалі сьледчым МА, некаторыя супрацоўнікі выказалі сур'ёзныя асьцярогі. Але начальства сказала, што ня трэба «панікаваць» і ня варта інфармаваць Rolls-Royce, бо ёсьць рызыка, што кампанія можа скасаваць праект, калі даведаецца пра гэта.
Толькі ўвесну 2021 году, калі аб праблемах паведамілі наўпрост у Rolls-Royce, пачалося расьсьледаваньне. Улетку 2022 году справу перадалі ў Міністэрства абароны.
Акрамя падводнага флёту Вялікай Брытаніі, існуюць асьцярогі, што і іншыя абарончыя магчымасьці маглі быць скампрамэтаваныя, бо высьветлілася, што папярэдні праект таксама перадалі на аўтсорсінг распрацоўнікам у Менску.
ГЛЯДЗІЦЕ ТАКСАМА: Беларуская ІТ-галіна ў сьвеце — лідэр альбо серадняк?