У ЗША расказалі аб прыярытэтах Байдэна да канца прэзыдэнцкага тэрміну

Энтані Блінкен заявіў, што пасьля таго, як Байдэн вырашыў не балятавацца на перавыбраньне, ён будзе інтэнсіўна працаваць над «умацаваньнем Украіны».

«Тое, на чым ён будзе моцна засяроджвацца ў наступныя паўгода, — гэта працяг працы, якую мы рабілі дагэтуль, асабліва спробы прынесьці мір на Блізкі Ўсход, пакласьці канец вайне ў Газе, вывесьці гэты рэгіён на лепшую траекторыю. Працягваць гэтак жа эфэктыўна працаваць, як ён гэта рабіў у справе працяглай расейскай агрэсіі супраць Украіны, і пераканацца, што мы працягнем рабіць усё магчымае для ўмацаваньня Ўкраіны».

Сярод іншых сфэраў, якія ня выйдуць з-пад увагі прэзыдэнта, Блінкен пералічыў удзел ЗША ў Інда-Ціхаакіянскім рэгіёне, супрацоўніцтва зь Японіяй, Карэяй, Аўстраліяй, Новай Зэляндыяй, Індыяй і іншымі краінамі. Ягоныя словы перадае «Голас Амэрыкі».

«Ён повен рашучасьці працягваць гэтую працу, і я повен рашучасьці працягваць яе разам зь ім», — падкрэсьліў дзяржсакратар ЗША.

Блінкен працуе з Байдэнам больш за 22 гады.

Акрамя таго, Энтані Блінкен пералічыў журналістам асноўныя дасягненьні Байдэна на пасадзе, адзначыўшы, што ў спадчыну ад ранейшых прэзыдэнтаў яму дасталіся праблемы.

«Калі вы на сэкунду падумаеце, што ён атрымаў у спадчыну, калі заступіў на пасаду, то гэта быў, напэўна, найгоршы крызіс аховы здароўя за апошнія 100 гадоў у гэтай краіне, найгоршы эканамічны крызіс з часоў Вялікай рэцэсіі, найгоршы дэмакратычны крызіс з тых часоў, якія я памятаю. . Былі краіны ў сьвеце, якія глядзелі на гэта і кружлялі, нібы акулы, каб знайсьці спосаб скарыстацца ўяўнай слабасьцю Злучаных Штатаў», — аналізуе Блінкен.

За апошнія 3,5 года, адзначыў дзяржсакратар ЗША, Байдэн зьмяніў сытуацыю ў краіне. Ён падаў Закон аб інфраструктуры, Закон аб мікрачыпах і навуцы і Закон аб дэфляцыі. Блінкен адзначыў, што ЗША сярод лідэраў як у зьніжэньні інфляцыі, так і ў забесьпячэньні росту занятасьці, у краіне самы нізкі ўзровень беспрацоўя за апошнія 60 гадоў.

Ацэньваючы Камалу Гарыс як патэнцыйную кандыдатку на прэзыдэнцкую гонку ад Дэмакратычнай партыі, Блінкен назваў яе «вядучым голасам» у зьнешняй палітыцы краіны.

«Літаральна пару месяцаў таму яна прадстаўляла ЗША на мірнай канфэрэнцыі па Ўкраіне, якая праходзіла ў Швайцарыі. Я бачыў яе кіраўніцтва зноў і зноў ва ўсіх кутках сьвету. Я ўбачыў чалавека, які мае вялікі досьвед, і вельмі дзейснага», — сказаў дзяржсакратар.

21 ліпеня прэзыдэнт ЗША Джо Байдэн зьняў сваю кандыдатуру з выбараў 2024 году, дзе яму супрацьстаяў былы прэзыдэнт ЗША Дональд Трамп. Байдэн падтрымаў віцэ-прэзыдэнтку Камалу Гарыс у якасьці кандыдаткі ў прэзыдэнты ад Дэмакратычнай партыі, каб кінуць выклік Трампу на выбарах 5 лістапада.

Яе кандыдатуру яшчэ мае зацьвердзіць зьезд партыі ў канцы жніўня.