У новага кіраўніка МЗС Беларусі другі замежны візыт. Першы быў у Кітай, цяпер — у КНДР

Міністар замежных спраў Беларусі Максім Рыжанкоў 23–25 ліпеня наведвае Карэйскую Народна-Дэмакратычную Рэспубліку (КНДР) з афіцыйным візытам.

Як адзначаецца ў афіцыйным паведамленьні МЗС Беларусі, візыт адбываецца на запрашэньне Міністэрства замежных спраў КНДР «у адказ».

Звычайна «візыт у адказ» ажыцьцяўляецца пасьля таго, як краіну наведаў афіцыйны прадстаўнік іншай краіны. У той жа час на сайце МЗС Беларусі і ў дзяржаўных СМІ не было ніякіх паведамленьняў аб візыце ў Беларусь міністра замежных спраў КНДР.

Актывізацыя адносін Беларусі і КНДР

Вядома, што сёлета ў красавіку КНДР наведваў намесьнік міністра замежных спраў Беларусі Яўген Шастакоў. Пра гэты візыт афіцыйна не паведамлялі, пра яго стала вядома з паўночнакарэйскага інфармацыйнага агенцтва ЦТАК. Толькі праз тыдзень пасьля гэтага тагачасны кіраўнік МЗС Беларусі Сяргей Алейнік паведаміў аб правядзеньні палітычных кансультацый у Пхэньяне.

Тады Сяргей Алейнік сказаў, што гэта былі «плянавыя кансультацыі замежнапалітычных ведамстваў», а ў часе візыту беларускай дэлегацыі абмяркоўвалі «двухбаковы парадак дня з акцэнтам на гуманітарную супрацу», а таксама «узаемадзеяньне ў міжнародных арганізацыях».

Паводле паведамленьня агенцтва ЦТАК, на перамовах у красавіку КНДР і Бедарусь дамовіліся пра «далейшае пашырэньне і разьвіцьцё традыцыйных дачыненьняў дружбы і супрацоўніцтва паміж дзьвюма краінамі шляхам умацаваньня кантактаў і візытаў на найвышэйшым узроўні, актыўнага стымуляваньня супрацы ў сфэры эканомікі і культуры, узмацненьня ўзаемнай падтрымкі на міжнароднай арэне адпаведна патрабаваньням часу».

У 2023 годзе Аляксандар Лукашэнка некалькі разоў прапаноўваў прэзыдэнту Расеі супольную супрацу з КНДР у трохбаковым фармаце. Сёлета ў чэрвені Ўладзімір Пуцін наведваў Пхэньян з афіцыйным візытам.