Бязьвізавы парадак уезду ў Беларусь для грамадзян Польшчы, Літвы, Латвіі (а таксама асоб, якія маюць статус неграмадзяніна Латвіі), які дзейнічае з 2022 году, цяпер распаўсюджваецца на грамадзян яшчэ 35 краін Эўропы, паведамілі ў Памежным камітэце Беларусі.
Скарыстаць права бязьвізавага ўезду ў Беларусь можна будзе неабмежаваную колькасьць разоў на працягу ўсяго пэрыяду дзеяньня да 31 сьнежня 2024 году ўключна. Колькасьць дзён знаходжаньня ў Беларусі па бязьвізе не павінна перавышаць 90 дзён у каляндарным годзе.
Тэрмін часовага знаходжаньня на тэрыторыі Беларусі для гэтых грамадзян складае ня больш за 30 дзён з дня ўезду.
Бязьвізавы рэжым ня будзе распаўсюджвацца на ўладальнікаў дыпляматычных і службовых пашпартоў, заявіў міністар замежных спраў Максім Рыжанкоў у праграме «Ничего личного» на АНТ.
Афіцыйная старонка Дзяржаўнага памежнага камітэту Рэспублікі Беларусь апублікавала ўвесь сьпіс краін, грамадзянам якіх цяпер не патрэбная віза ў Беларусь:
- Аўстрыя
- Андора
- Бэльгія
- Баўгарыя
- Босьнія і Герцагавіна
- Ватыкан
- Вялікая Брытанія
- Вугоршчына
- Грэцыя
- Данія
- Ірляндыя
- Ісьляндыя
- Гішпанія
- Італія
- Кіпр
- Ліхтэнштэйн
- Люксэмбург
- Мальта
- Манака
- Нарвэгія
- Нідэрлянды
- Нямеччына
- Партугалія
- Румынія
- Сан-Марына
- Паўночная Македонія
- Славаччына
- Славенія
- Фінляндыя
- Францыя
- Харватыя
- Чэхія
- Швайцарыя
- Швэцыя
- Эстонія (у тым ліку асобы без грамадзянства, якія пастаянна пражываюць у Эстонскай Рэспубліцы).
Іншаземцы, якія прыбылі ў бязьвізавым парадку на тэрыторыю Рэспублікі Беларусь, змогуць рухацца транзытам у трэція краіны, за выключэньнем Расейскай Фэдэрацыі, у тым ліку і праз пункты пропуску ў аэрапортах. Гэты парадак пачне дзейнічаць з 8.00 19 ліпеня 2024 году.
Пра ўвядзеньне бязьвізавага рэжыму ў дачыненьні да 35 дзяржаў Эўропы напісаў неафіцыйны канал МЗС Беларусі «Глас МИДа».
«Ну і рашэньне, ну і крок! Вось яны, рэальныя справы і ўчынкі. Вось яна, сапраўдная дэманстрацыя міралюбнасьці і добрасуседзтва. Чым адкажаце, дарагія нашы Дуды, Сікорскія, Бэрбакі і Шольцы?» — так пракамэнтаваў канал бязьвіз для эўрапейцаў.
ГЛЯДЗІЦЕ ТАКСАМА: «Беларускія ўлады толькі парадаваліся». Па кім ударыць забарона на праезд у ЭЗ машын зь беларускімі нумарамі ГЛЯДЗІЦЕ ТАКСАМА: Смартфоны — не, пыласосы — так. Што зараз нельга везьці з Эўразьвязу ў Беларусь і ў адваротным кірунку