Раніцай 24 чэрвеня Расея атакавала дзьвюма ракетамі Адэсу, а Херсонскую вобласьць — кіраванымі авіябомбамі.
Як паведамілі ў апэратыўным камандаваньні Паветраных сіл Украіны, адну ракету змаглі зьбіць, а другая трапіла па аб’ектах.
«Загінулых няма, тры чалавекі пацярпелі. Пасьля пацэльваньня ў аб’ект пачаўся пажар на трох тысячах квадратных мэтраў», — паведаміў у этэры ўсеўкраінскага тэлемаратону кіраўнік Адэскай абласной вайсковай адміністрацыі Алег Кіпер.
Паводле яго, Расея атакавала ракетамі «Іскандэр-К». Пацярпелых шпіталізавалі, іх стан ацэньваецца як сярэдне цяжкі.
Улады паведамілі, што ракета пацэліла ў склад адной з гандлёвых сетак. Алег Кіпер падкрэсьліў, што гэта быў невайсковы аб’ект.
У Херсонскай вобласьці ў выніку абстрэлу адзін чалавек загінуў і 8 атрымалі раненьні.
Расейцы не спыняюць абстрэлы памежных абласьцей — у Харкаўскай вобласьці загінуў адзін чалавек і 13 атрымалі раненьні, у Чарнігаўскай і Сумскай абласьцях пацярпелі прыватныя і адміністрацыйныя будынкі, без ахвяр.
ГЛЯДЗІЦЕ ТАКСАМА: Ракетны ўдар расейцаў па Харкаву: у жылым доме загінулі як мінімум два чалавекі, 15 параненыяРасея стала абстрэльвае населеныя пункты на лініі сутыкненьня
Улады Данецкай вобласьці паведамілі пра абстрэл 24 чэрвеня адразу некалькіх населеных пунктаў Пакроўскага, Бахмуцкага і Краматорскага раёнаў.
У выніку толькі аднаго ўдару па Пакроўску сама меней 4 чалавекі загінулі і 34 атрымалі раненьні. Сярод параненых — двое дзяцей, адно зь іх у цяжкім стане.
Расея абстраляла Пакроўск ракетамі «Іскандэр» — адзін прыватны дом цалкам зьнішчылі і 16 атрымалі пашкоджаньні.
Па адным загінулым і параненым — у Курахавым і Тарэцку. Улады заклікаюць жыхароў прыфрантавой лініі тэрмінова выяжджаць на падкантрольныя Ўкраіне тэрыторыі, дзе больш бясьпечна.
ГЛЯДЗІЦЕ ТАКСАМА: У Мінабароны Расеі кажуць, што Крым «абстралялі» ATACMS: 5 чалавек загінулі, 100 параненыяВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.