У сьледчым ізалятары № 1 расейскага Растову-на-Доне некалькі чалавек 16 чэрвеня захапілі ў закладнікі двух супрацоўнікаў установы. Пра гэта паведамляе рэгіянальнае ўпраўленьне Фэдэральнай службы выкананьня пакараньняў.
Абнаўленьне. Захопнікі забітыя пры штурме, супрацоўнікі, якія знаходзіліся ў закладніках, вызваленыя і не пацярпелі, трансьлююць расейскія агенцтвы заяву службы пасьля праведзенай спэцназам апэрацыі.
Як сьцьвярджае тэлеграм-канал SHOT, сілавікі забілі ўсіх шасьцярых захопнікаў: трое былі ў прытомнасьці, але памерлі да прыезду «хуткай». Па дадзеных крыніцы выдання 161.ru, забітыя двое, чацьвёра затрыманыя.
Як было?
Ведамства не ўдакладняе, якія патрабаваньні выстаўляюць захопнікі. Яно сьцьвярджае, што зь імі вядуцца перамовы, і называе абстаноўку «кантраляванай».
У той жа час Baza ўдакладняе, што шасьцёра падсьледных здолелі выбіць аконныя краты ў сваёй камэры ў СІЗА і праніклі ў дзяжурную частку. Якраз там яны ўзялі закладнікаў.
Baza прыводзіць імёны захопнікаў. Частка з іх праходзіць па артыкулах аб удзеле ў тэрарыстычных арганізацыях, іх вінавацяць у сувязі з «Ісламскай Дзяржавай».
У Растоў-на-Доне выехалі супрацоўнікі цэнтральнага апарату Фэдэральнай службы выкананьня пакараньняў.
Пазьней пачаўся штурм СІЗА-1 спэцназам. Былі чутныя дзьве аўтаматныя чаргі.
У 11:50 менскага часу канал Shot напісаў, што два наглядчыкі, якія былі ў закладніках, вызваленыя. На тэрыторыю СІЗА заехала хуткая дапамога. Паводле папярэдняй інфармацыі, двое з нападнікаў забітыя.
ГЛЯДЗІЦЕ ТАКСАМА: Рэпрэсіі як зброя заплянаванай перамогі. Якімі страхамі апанаваныя Пуцін і Лукашэнка на трэцім годзе вайны