Падчас візыту ў ЗША Ціханоўская сустрэлася з дыпляматамі краін G7 і амэрыканскімі сэнатарамі

Сьвятлана Ціханоўская пачала свой візыт у Вашынгтон з сустрэчы з амбасадарамі і дыпляматамі краін Вялікай сямёркі. Мерапрыемства было арганізавана кіраўніком дэлегацыі ЭЗ у ЗША. Ціханоўская падчас сустрэчы падкрэсьліла важнасьць міжнароднай падтрымкі для Беларусі і неабходнасьць працягваць ціск на рэжым Лукашэнкі дзеля вызваленьня палітвязьняў і правядзеньня свабодных выбараў.

Паводле прэсавай службы Ціханоўскай, асноўнымі тэмамі абмеркаваньня былі:

• Захады для ўзмацненьня санкцыйнага ціску на рэжым Лукашэнкі і неабходнасьць павелічэньня фінансавай дапамогі Беларусі.
• Падтрымка беларускіх студэнтаў: магчымасьці пашырэньня стыпэндыяў для іх і магчымасьці іх выезду на навучаньне ў ЗША і іншыя краіны.
• Пытаньне пошуку і замарожваньня актываў Лукашэнкі ў іншых краінах, у тым ліку ў Аб'яднаных Арабскіх Эміратах.
• Роля рэжыму Лукашэнкі ў вайне, супрацоўніцтва паміж расейскай і беларускай арміямі.
• Падтрымка палітвязьняў: дыпляматы прапанавалі арганізаваць вялікую кампанію ў ЗША па палітвязьнях, уключаючы публічны ліст генсакратару ААН ад кангрэсмэнаў і сэнатараў.
• Абмяркоўвалі супрацоўніцтва Лукашэнкі з Іранам, Кітаем і іншымі аўтарытарнымі рэжымамі.

11 чэрвеня зь Ціханоўскай сустрэліся амэрыканскія сэнатары Джын Шагін (старшыня сэнацкага падкамітэту міжнародных адносін у супрацоўніцтве ў галіне Эўропы і рэгіянальнай бясьпекі і сузаснавальніца фракцыі «Свабодная Беларусь», дэмакрат ад штату Нью-Гэмпшыр), сябра фракцыі «Свабодная Беларусь» Рычард Дурбін (дэмакрат ад Ілінойса) і Пітэр Ўэлч (дэмакрат ад штату Вэрмонт).

Падчас сустрэчы сэнатары і Ціханоўская гаварылі пра падтрымку Лукашэнкам Пуціна ў вайне Расеі супраць Украіны.

«Беларускаму народу надакучыў прыгнёт Лукашэнкі і падпарадкаваньне Пуціну, калі ён бязьлітасна нападае на Ўкраіну, — сказаў Рычард Дурбін. — Я цалкам падтрымліваю імкненьне беларусаў жыць у дэмакратычнай, сувэрэннай, незалежнай краіне».

Сэнатарка Джын Шагін сказала, што радая зноў сустрэцца зь Ціханоўскай, зь якой яна «шчыльна супрацоўнічае, каб падтрымаць усіх беларусаў, якія выступаюць за больш свабодную і дэмакратычную будучыню для сваёй краіны». Таксама яна згадала пра палітвязьняў, якія цяпер знаходзяцца ў беларускіх турмах. «Падчас нашай сустрэчы мы абмеркавалі магчымасьці палепшыць цяжкае становішча тых, хто змагаецца за свабоду», — адзначыла Джын Шагін.

Сэнатарка Джын Шагін (зьлева) і Сьвятлана Ціханоўская

Сэнатар Пітэр Ўэлч адзначыў, што для яго «было вялікім гонарам» далучыцца да размовы зь Ціханоўскай і таксама выказаў сваю салідарнасьць зь беларусамі.

Таксама падчас першага дня візыту ў Вашынгтон Сьвятлана Ціханоўская сустрэлася з экс-сьпікеркай Палаты Прадстаўнікоў ЗША Нэнсі Пэлосі. Ціханоўская падзякавала Нэнсі Пэлосі за салідарнасьць і абмеркавала зь ёй неабходнасьць прыняцьця Акту аб дэмакратыі ў Беларусі. Ціханоўская распавяла Пэлосі пра сытуацыю з палітвязьнямі, узмацненьне рэпрэсіяў і спробы Расеі паглынуць Беларусь, пра вынікі выбараў у Каардынацыйную раду і пляны дэмакратычных сіл на 2025 год.

Нэнсі Пэлосі (зьлева) і Сьвятлана Ціханоўская

Падчас сустрэч з Пэлосі і сэнатарамі абмеркавалі:

• праект новага Акту аб дэмакратыі ў Беларусі, Ціханоўская заклікала прыняць яго як найхутчэй;
• кампанію ў падтрымку беларускіх палітвязьняў, у прыватнасьці зьняволеных беларускіх журналістаў, і магчымыя крокі па іх вызваленьні, у тым ліку абмяркоўвалі пытаньне санкцыяў;
• мерапрыемствы па Беларусі падчас саміту NATO;
• працяг і павелічэньне падтрымкі для незалежных мэдыяў, рэпрэсаваных, ініцыятываў у сфэры культуры, а таксама праваабарончых і іншых ініцыятываў, а таксама падтрымку беларусаў у ЗША.

Таксама Ціханоўская сустрэлася з намесьнікам Дзяржаўнага сакратара ЗША ў палітычных пытаньнях Джонам Басам. На сустрэчы таксама прысутнічаў Крыс Сьміт, які адказвае ў Дзярждэпартамэнце за Беларусь.

Джон Бас і Сьвятлана Ціханоўская

Падчас гэтай сустрэчы абмеркавалі:

• працяг Стратэгічнага дыялёгу з ЗША (ў сьнежні плянуецца высокаўзроўневая сустрэча ў рамках дыялёгу), прызначэньне спэцпасланьніка па Беларусі;
• фінансавую падтрымку беларускіх мэдыяў, рэпрэсаваных, культурніцкіх і адукацыйных ініцыятываў, а таксама спрашчэньне працэдуры выдачы візаў для беларусаў;
• сытуацыю з палітвязьнямі, магчымыя крокі па іх вызваленьні;
• новыя санкцыі супраць рэжыму Лукашэнкі, закрыцьцё «шчылінаў», сынхранізацыю санкцыяў паміж ЭЗ і ЗША, у прыватнасьці, за ўдзел рэжыму Лукашэнкі ў вайне;
• наступныя крокі па прыцягненьні рэжыму Лукашэнкі да адказнасьці празь міжнародныя суды;
• міжнародную палітыку: як тэма Беларусі можа прагучаць на Саміце міру па Ўкраіне ў Швайцарыі і Саміце NATO, які пройдзе празь месяц у Вашынгтоне;
• цяперашнія адносіны Беларусі з Украінай і ўзаемадзеяньне з украінскім урадам.

Прадстаўнікі ЗША запэўнілі Ціханоўскую, што палітыка ЗША застанецца пасьлядоўнай і прынцыповай у дачыненьні да Беларусі і супраца з дэмакратычнымі сіламі працягнецца.

Якія яшчэ сустрэчы чакаюцца

11–13 чэрвеня Святлана Ціханоўская наведвае Вашынгтон, дзе плянуецца яе выступ у Кангрэсе ЗША аб праблемах палітвязьняў.

Таксама Ціханоўская правядзе сустрэчы ў Белым доме і Дзярждэпартамэнце ЗША, сустрэнецца з кангрэсмэнамі і сэнатарамі, амбасадарамі, журналістамі, а таксама зь беларусамі, якія жывуць у ЗША.

Сярод іншага, заплянаваныя сустрэчы Ціханоўскай зь іншымі прадстаўнікамі Рады нацыянальнай бясьпекі ЗША: старшынёй падкамітэту замежных спраў Томасам Кінам-малодшым, дарадцам віцэ-прэзыдэнта ў нацыянальнай бясьпецы Філам Горданам, старшынёй Камітэту замежных спраў Сэнату Бэнджамінам Кардынам.