«У гэтых раёнах пасьля ўдараў украінскіх ракетнікаў зафіксавалі тэрміновае спыненьне работы радараў комплексаў С-300/С-400. Апроч гэтага, адзначаецца далейшая дэтанацыя ва ўсіх трох раёнах стартавых пазыцый зэнітных ракетных дывізіёнаў Расейскай Фэдэрацыі», — адзначаецца ў афіцыйным паведамленьні ўкраінскага Генштабу.
Паводле ўкраінскага боку, супрацьпаветраныя сродкі Расеі не змаглі перахапіць ніводную з запушчаных ракет.
У Міністэрстве абароны Расеі пра начны ўдар па Крыме нічога не паведамляюць. Сьцьвярджаюць, што супрацьпаветраныя сілы Расеі перахапілі некалькі бесьпілётнікаў над Белгарадзкай і Бранскай вобласьцямі.
Мясцовыя ўлады не паведамляюць аб якіх-небудзь разбурэньнях і пацярпелых.
У апошнія некалькі тыдняў Украіна спрабавала дабіцца ад сваіх партнэраў дазволу на выкарыстаньне перададзенай ёй зброі па расейскіх войсках на тэрыторыі Расеі.
Раней 13 краін паведамілі аб магчымасьці выкарыстоўваць іхную зброю для ўдараў па Расеі. Сярод іх — Вялікая Брытанія, Польшча, Швэцыя, Францыя, Канада, Чэхія, Нідэрлянды, Фінляндыя, Эстонія, Латвія, Літва, Нарвэгія і Данія.
31 траўня стала вядома, што прэзыдэнт ЗША Джо Байдэн таксама негалосна дазволіў Украіне выкарыстоўваць амэрыканскую зброю для ўдараў па вайсковых аб’ектах на тэрыторыі Расеі, але толькі на мяжы з Харкаўскай вобласьцю, дзе расейскія войскі вядуць наступ.
ГЛЯДЗІЦЕ ТАКСАМА: Байдэн часткова адмяніў забарону на выкарыстаньне Ўкраінай зброі ЗША для нанясеньня ўдараў унутры Расеі
У той жа дзень афіцыйны прадстаўнік ураду Нямеччыны Штэфан Гэбэштрайт заявіў, што Ўкраіна можа выкарыстоўваць перададзеную ёй зброю па расейскіх аб’ектах.