7 чэрвеня а 21-й гадзіне на нью-ёрскім фэстывалі Tribeca ў кінатэатры Village East by Angelika пройдзе прэм’ера карціны «Пад шэрым небам», створанай беларуска-польскай рэжысэркай Марай Тамковіч, паведамляе reform.news.
Трэйлер поўнамэтражнага ігравога фільму, які быў натхнёны постацямі і гісторыяй беларускіх журналістаў Кацярыны Андрэевай і Ігара Ільяша, ужо можна паглядзець у сеціве.
Фільм «Пад шэрым небам» быў адабраны ў конкурс «Найлепшы замежны ігравы фільм» амэрыканскага фэстывалю, заснаванага Робэртам Дэ Ніра, Джэйн Розэнталь і Крэйгам Хаткофам, з сотні прэтэндэнтаў з усяго сьвету. Зь ім у сэкцыі будуць спаборнічаць сем стужак рэжысэраў з Харватыі, Швэцыі, Бразыліі, Сынгапуру, Нямеччыны ды іншых краін.
У галоўных ролях у карціне здымаліся Аляксандра Вайцяховіч, Валянцін Навапольскі, Паліна Чабатарова. Андрэй Новікаў.
ГЛЯДЗІЦЕ ТАКСАМА: «Хацела б зьняць сэрыял аб прыходзе Лукашэнкі да ўлады». Вялікая размова з Марай ТамковічЯк падкрэсьлівае Мара Тамковіч, для яе стужка стала спробай зразумець, што адбываецца зь Беларусьсю, беларусамі пасьля 2020 году.
На сайце фэстывалю фільм прадстаўлены наступным чынам:
«Калі антырэжымную журналістку Лену арыштоўваюць за прамую трансьляцыю жорсткага разгону дэманстрацыі пратэсту супраць беларускіх выбараў 2020 году, яе муж Ільля сутыкаецца зь немагчымай сытуацыяй. Падвяргаючыся далейшым міліцэйскім рэйдам і сутыкаючыся з магчымай рэальнасьцю, што яго жонка правядзе гады ў турме, Ільля павінен лічыцца з тым, ад чаго яму, магчыма, давядзецца адмовіцца, застаўшыся зь Ленай. У той жа час на зьняволеную Лену ціснуць улады, каб яна адмовілася ад сваёй актыўнасьці і здрадзіла сваім прынцыпам».
ГЛЯДЗІЦЕ ТАКСАМА: Фільм беларускі Мары Тамковіч трапіў у праграму нью-ёрскага фэстывалю, заснаванага Робэртам Дэ Ніра