Горадзенскі гарвыканкам адказаў на пэтыцыю з просьбай растлумачыць, куды і чаму з Новага замку ў Горадні зьнікла памятная дошка ў гонар Тадэвуша Касьцюшкі і падзей паўстаньня 1794 году і ў якія тэрміны яе плянуюць вярнуць на месца.
У Горадзенскім гарадзкім выканаўчым камітэце заявілі, што разгледзелі калектыўны зварот «з выездам на месца» і адказалі на яго так:
«Гарадзенскі гарвыканкам не валодае зьвесткамі пра аб’ект, указаны ў паведамленьні», — гаворыцца ў адказе.
У выпадку нязгоды з адказам гарвыканкам прапануе аўтарам звароту абскардзіць яго ў Горадзенскім абласным выканаўчым камітэце.
Драўляная мэмарыяльная шыльда, прысьвечаная побыту нацыянальнага героя Беларусі Тадэвуша Касьцюшкі ў Горадні, зьнікла са сьцяны Новага замку ў сярэдзіне красавіка 2024 году.
Шыльда месьцілася зьлева ад цэнтральнага ўваходу ў Новы замак і была прысьвечана падзеям паўстаньня 1794 году. Тады ў замку працавала Паўстанцкая парадкавая камісія, быў там і кіраўнік паўстанцаў Тадэвуш Касьцюшка. 30 кастрычніка 1794 году ён правёў у каралеўскім палацы нараду з кіраўнікамі паўстанцкіх атрадаў Вялікага Княства Літоўскага. Шыльду, прысьвечаную Касьцюшку, усталявалі ў 1994 годзе.
У канцы красавіка ў Горадні запусьцілі збор подпісаў пад пэтыцыяй за вяртаньне мэмарыяльнай дошкі Касцюшку на сьцяну Новага замка. Зварот падпісалі 83 чалавекі.
ГЛЯДЗІЦЕ ТАКСАМА: У Горадні зьбіраюць подпісы за вяртаньне мэмарыяльнай дошкі Касцюшку на сьцяну Новага замка- Летам 2023 году прарасейская актывістка з Горадні Вольга Бондарава хвалілася, што прасіла Горадзенскі гарвыканкам прыбраць са сьпісу знакавых для гораду людзей у Цэнтралізаванай бібліятэчнай сыстэме беларускага героя Кастуся Каліноўскага, а пасьля і Тадэвуша Касьцюшку. Першага яна назвала «польскім тэрарыстам», другога — «змагаром за Польшчу супраць Расеі». Пры гэтым культуру яна называла выключна «культуркай». Абедзьве згадкі зьніклі з сайта ЦБС літаральна праз пару дзён. Са згадкамі пра Касьцюшку ў Горадні Бондарава змагалася і раней.
- 11 ліпеня 2023 году з тэрыторыі горадзенскага чыгуначнага вакзалу прыбралі 30-гадовы памятны знак паўстанцам 1863 году. Яго замянілі на памятную шыльду савецкім партызанам. Тады Бондарава таксама хвалілася, што спрычынілася да зьнікненьня знака. Пазьней стала вядома, што памятны знак дэмантавалі супрацоўнікі Горадзенскай гарадзкой жыльлёва-камунальнай гаспадаркі, а горадзенскія чыноўнікі сьцьвярджалі, што нічога пра гэта ня ведаюць.
- Зараз памяць пра Тадэвуша Касьцюшку захоўваецца ў горадзенскім катэдральным касьцёле Сьвятога Францыска Ксавэрыя: там ёсьць дзьве мэмарыяльныя шыльды. Таблічка з надпісам па-польску 1917 году ўсталяваная да сотай гадавіны з дня ягонай сьмерці. Яшчэ адну ўсталявалі ў 2017 годзе зьлева ад галоўнага алтара. Яна зробленая з адмысловага шкла і мае надпісы на беларускай, польскай і ангельскай мовах: «1817–2017. Тадэвушу Касьцюшку — удзячныя нашчадкі».