Ужо сёньня

Ужо сёньня: гадавіна рэфэрэндуму, які зьмяніў дзяржаўныя сымбалі і зрабіў расейскую мову другой дзяржаўнай

Вокладка кнігі Вінцука Вячоркі "Пра герб і сьцяг" з ілюстрацыямі Пятра Драчова для дашкольнага і малодшага школьнага ўзросту, якая выйшла ў 1993 годзе

Падзеі 14 траўня ў беларускай і ўсясьветнай гісторыі.

Дата дня

14 траўня 1995 году прайшоў першы ў гісторыі Рэспублікі Беларусь рэфэрэндум. У выніку:

  • краіна зьмяніла дзяржаўную сымболіку часоў адноўленай незалежнасьці — герб «Пагоня» і бел-чырвона-белы сьцяг — на падпраўленыя савецкія сымбалі;
  • расейская мова набыла статус дзяржаўнай.

Таксама рэфэрэндум даў Лукашэнку карт-блянш на эканамічную інтэграцыю з Расеяй і права спыняць паўнамоцтвы Вярхоўнага Савету.

ГЛЯДЗІЦЕ ТАКСАМА: Рэфэрэндум-95 пра сымболіку і мову ня быў легітымным

Таксама ў гэты дзень

1613 — мястэчка Жыровічы атрымала Магдэбурскае права.

1659 — пачалася маскоўская аблога Быхаўскага замку, якая працягнецца да 4 сьнежня.

1874 — у Менску пачаў дзейнічаць першы фантан, упрыгожаны скульптурнай кампазыцыяй «Хлопчык зь лебедзем».

1948 — абвешчаная незалежнасьць Ізраілю.

1954 — у Гаазе дзяржавы — сябры ААН падпісалі «Канвэнцыю аб абароне культурных каштоўнасьцяў у выпадку збройнага канфлікту».

1955 — у Варшаве падпісалі дэклярацыю аб стварэньні Арганізацыі вайсковай дамовы. Так званая Варшаўская дамова краінаў сацлягеру існавала да 1 ліпеня 1991 году.

2011 — засуджаны на 5 гадоў турмы былы кандыдат у прэзыдэнты Андрэй Саньнікаў.

Андрэй Саньнікаў падчас прысуду 14 траўня 2011

2015 — Беларусь далучылася да Балёнскага працэсу. 11 красавіка 2022 году сяброўства прыпынена.

У гэты дзень нарадзіліся

1814 — Каятан Касовіч, беларускі і расейскі навуковец-усходазнаўца, першы вучоны-санскрытоляг у Расеі.

1869 — Янкель Кругер, беларускі жывапісец і пэдагог, заслужаны дзяяч мастацтваў Беларусі.

1899 — Тодар Куніцкі, лекар, адзін з заснавальнікаў Беларускага студэнцкага саюзу ў Вільні і Беларускага сялянскага саюзу.

1907 — Язэп Жыновіч, дырыгент, кампазытар і пэдагог, народны артыст БССР і СССР, прафэсар, ляўрэат Дзяржаўнай прэміі БССР.

1956 — палітвязень Уладзімер Мацкевіч, філёзаф, грамадзка-палітычны дзяяч.

ГЛЯДЗІЦЕ ТАКСАМА: «Найяскравейшая постаць крытычнага інтэлектуала». Хто такі Ўладзімер Мацкевіч, якога ня выпусьцілі з турмы пасьля 10 сутак

У памяці

1873 — Міхаіл Дзьмітрыеў, дырэктар Наваградзкай гімназіі.

1939 — Павал Жаўрыд, дзяяч нацыянальна-вызваленчага руху, адзін з кіраўнікоў Слуцкага паўстаньня.

1998 — Фрэнк Сінатра, амэрыканскі сьпявак, актор і шоўмэн.