У Расонах на поўначы Віцебскай вобласьці пахаладала да 5,8 градуса марозу — гэта новы абсалютны мінімум ночы на 9 траўня, сьведчыць праведзены «Позіркам» параўнальны аналіз апэратыўных і архіўных зьвестак Белгідрамету. Ранейшы антырэкорд трымаўся з 1912 году — 3,3 градуса ніжэй за нуль у Менску.
У двух населеных пунктах абнавіліся гістарычныя мінімумы месяца. У Верхнядзьвінску тэмпэратура апусьцілася да 4,6 градуса марозу (было −4,5 градуса 11 траўня 2017 году), у Мсьціславе — да мінус 3,4 (–2,6 градуса 8 траўня 2023 году).
Яшчэ ў двух гарадах травеньскія мінімумы паўтарыліся, адначасова перапісаныя антырэкорды ночы на 9 траўня. У Горках было 4,4 градуса марозу (столькі ж — 8 траўня 1953 году; ранейшы антырэкорд ночы — 2,6 градуса ніжэй за нуль у 1912 годзе), у Слаўгарадзе — 3,1 градуса марозу (столькі ж — 1 траўня 2017 году; ранейшы антырэкорд ночы — 0,8 градуса вышэй за нуль у 1999 годзе).
Усяго мінулай ноччу зафіксавана 19 лякальных рэкордаў холаду, у тым ліку ў двух абласных цэнтрах — Віцебску (–4,1 супраць −3,1 градуса ў 1999 годзе) і Магілёве (–1,3 супраць −0,9 градуса таксама ў 1999 годзе). У Менску пахаладала да −2,3, аднак антырэкорд выстаяў (паказчык згаданы вышэй).
У ноч на 8 траўня былі перакрытыя два і паўтораны адзін лякальны мінімум. Уначы 10 і 11 траўня тэмпэратура чакаецца плюсавая, 12 траўня Белгідрамет прагназуе прымаразкі да мінус 3.
ГЛЯДЗІЦЕ ТАКСАМА: Адзін мэханізатар на ўсю гаспадарку і «абрад першай баразны». Як сёлета праходзіць «барацьба за рэкордны ўраджай» ГЛЯДЗІЦЕ ТАКСАМА: На ўсіх мэтэастанцыях Беларусі 9 красавіка абнавіліся тэмпэратурныя рэкорды за ўсю гісторыю назіраньняў