«ПіК Свабоды». Ударыць па кішэні: новыя абмежаваньні на прадпрымальніцтва

Пра гэта разважае эканамістка з дасьледчага цэнтру BEROC Анастасія Лузгіна.

Пакуль што няма афіцыйнага рашэньня ўраду, якія менавіта віды дзейнасьці стануць незаконнымі для індывідуальных прадпрымальнікаў. Сьпіс мае зьявіцца да 1 ліпеня. Папярэдне чыноўнікі гаварылі пра юрыдычныя паслугі, онлайн-курсы, навучаньне, гуртовы гандаль, турыстычныя паслугі. Паводле Белстату, на 1 студзеня ў Беларусі было крыху болей за 250 тысяч ІП — дзясяткі тысяч зь іх могуць сысьці з прадпрымальніцтва.

Глядзіце размову на відэа цалкам

Тут фрагмэнты інтэрвію

• ІП ніколі не займалі значнай долі ў эканоміцы, але гэта яе важная частка, якая выконвае некалькі функцый: гэта нейкая вытворчасьць і паслугі, гэта занятыя людзі, а таксама і працоўныя месцы для іншых людзей. У некаторых мясцовасьцях, куды не заходзяць буйныя кампаніі, менавіта ІП могуць аказваць паслугі, якія бязь іх былі б абмежаваныя. Можна нават сказаць, што ІП нясуць сацыяльную нагрузку.
• Дзяржава за апошнія гады ўжо ўзмацняла падатковую нагрузку на індывідуальных прадпрымальнікаў. Але калі індывідуальны прадпрымальнік перарэгіструецца ў юрыдычную асобу, гэта ўжо зусім іншая адказнасьць і нагрузка. Для гэтага патрэбныя прафэсійныя веды ў сфэры бухгальтэрыі, фінансаў, юрыдычныя веды. Трэба будзе альбо давучвацца, альбо значна вырастуць выдаткі — да прыкладу, на прафэсійных бухгальтараў.
• Нядаўна прадстаўнік «БСБ-банку» казаў, што больш за 90 працэнтаў ІП, якія закрываюць у іх рахункі, кажуць пра спыненьне дзейнасьці, а не пра стварэньне юрыдычнай асобы.

• ІП можна параўнаць са стартапамі — людзі спрабуюць сябе ў бізнэсе. Калі такую магчымасьць прыбіраюць і прымушаюць адразу «пераскокваць» на юрыдычныя асобы, дык, на маю думку, гэта ня вельмі правільна для структуры эканомікі.
• Магчыма, для дзяржавы адна з матывацый — гэта тое, што людзі, якія сыдуць з ІП, могуць папоўніць шэрагі найманых працаўнікоў. Ужо ня першы год беларуская эканоміка губляе кадры праз дэмаграфічныя працэсы і рэлякацыю людзей у іншыя краіны.
• У апошнія гады элемэнты плянавасьці і кантролю ў эканоміцы Беларусі ўзмацняюцца. А ІП цяжэй кантраляваць.