«Кібэрпартызаны» заявілі, што ўзламалі «базу даносаў у КДБ»

Вынікі сваёй апэрацыі «Кібэрпатызаны» назвалі «зьлівам даносаў у КДБ». Каля 40 тысяч зваротаў былі пададзеныя праз сайт КДБ за 9 гадоў.

«Калі вы раптам не заўважылі, то разам з базай сайту КДБ мы выклалі ў сетку і даносы, якія адпраўлялі чэкістам праз партал зь верасьня 2014 па жнівень 2023 гг. Цяпер скаргі „інфарматараў“ КДБ у адкрытым доступе, а таксама прапановы замежных грамадзян пайсьці на супрацоўніцтва. Самыя цікавыя зь іх ужо хутка на нашым канале», — напісалі «Кібэрпартызаны».

Раней «Кібэрпартызаны» заявілі, што яшчэ восеньню 2023 году прабраліся на сайт КДБ і выпампавалі адтуль усю даступную інфармацыю. На гэты момант бачына Камітэту дзяржбясьпекі не працуе ўжо больш за 2 месяцы.

У якасьці доказу «Кібэрпартызаны» выклалі сьпіс адмінаў і базу дадзеных сайта.

Раней у красавіку «Кібэрпартызаны» заявілі, што правялі кібэратаку на сэрвэры «Гродна Азоту», патрабуючы вызваліць частку палітвязьняў.

• «Кібэрпартызаны» — беларуская дэцэнтралізаваная супольнасьць ананімных праломнікаў (хакераў), якая зьявілася ў верасьні 2020 году.
• Яны атрымалі вядомасьць дзякуючы шэрагу пасьпяховых кібэратак на рэсурсы беларускіх дзяржаўных установаў і сілавых структураў, публікацыям кампрамату на прадстаўнікоў апошніх, а таксама разьмяшчэньнем у адкрытым доступе службовай і сакрэтнай інфармацыі.
• Супольнасьць пачала дзейнасьць у адказ на дзяржаўныя рэпрэсіі супраць пратэстоўцаў.
• Сваю дзейнасьць яны называюць барацьбой з Аляксандрам Лукашэнкам.
• «Кібэрпартызаны» актыўна дапамагаюць аб’яднаньню беларускіх сілавікоў ВуРol у правядзеньні расьсьледаваньняў.
• Таксама «Кібэрпартызаны» дапамагаюць палку імя Кастуся Каліноўскага ва Ўкраіне правяраць новых добраахвотнікаў.

Радыё Свабода ня можа незалежна і апэратыўна спраўдзіць агучаныя дадзеныя.