Як паведамляе BBC Украіна, такія дзеяньні ўладаў Кіева зьвязаныя з апасродкаванымі пагрозамі ўдару па кіеўскіх шпіталях кіраўніка КДБ Беларусі Івана Тэртэля. На паседжаньні Ўсебеларускага народнага сходу кіраўнік КДБ пагражаў супрацьдзейнічаць нейкім «тэрарыстам з Украіны», заявіўшы, што «іх напаткае пакараньне, нягледзячы на тое, што сваім логавам яны абралі кіеўскія лякарні па адрасе Багатырская 30-32, дзе схаваліся за сьпіны хворых дзяцей». Пры гэтым кіраўнік КДБ зазначыў, што ў барацьбе з тэрарызмам сілавікі будуць дзейнічаць «па законах ваеннага часу».
У Кіеве гэтую заяву ўспрынялі як анонс удару па шпіталях, чые адрасы былі названыя ў кантэксьце барацьбы з тэрарызмам. «Гэта абсалютная хлусьня і правакацыя ворага, якую ён спрабуе выкарыстоўваць для ўдару па сацыяльнай інфраструктуры сталіцы», — гаворыцца ў заяве кіеўскай адміністрацыі.
Каб засьцерагчы хворых дзяцей, іх бацькоў і мэдпэрсанал, улады Кіева «робяць усё магчымае, каб перавезьці пацыентаў і мэдыкаў у іншыя мэдустановы сталіцы», — сказана ў заяве.
«Горад зьвярнуўся ў СБУ, Міністэрства аховы здароўя па дапамогу і праінфармаваў аб мерах, якія прымаюцца для захаваньня жыцьця і здароўя пацыентаў і пэрсаналу бальніц», — паведаміла адміністрацыя ўкраінскай сталіцы. Пазьней мэр Кіева Віталь Клічко паведаміў, што бальніцы эвакуавалі.
У СБУ таксама адрэагавалі на пагрозы шэфа беларускага КДБ, заклікаўшы ўспрымаць заявы ўладаў РБ як інфармацыйна-псыхалягічныя спэцапэрацыі, якія граюць на руку РФ.
У СБУ заявілі, што рэжым Беларусі цалкам здаў сваю радзіму Расеі. «Беларускім уладам трэба не палохаць украінцаў псэўдазаявамі, а думаць аб тым, як не апынуцца на лаве падсудных у Гаазе побач з крамлёўскім дыктатарам», – гаворыцца ў заяве СБУ.
ГЛЯДЗІЦЕ ТАКСАМА: Штучныя промні фальшывай славы. Пра УНС як пра сэанс псыхатэрапіі і самагіпнозу