У апэратыўным камандаваньні Паветраных сіл Украіны паведамілі, што ў ноч на 28 сакавіка Расея запусьціла па мірных гарадах Украіны тры крылатыя ракеты Х-22, адну супрацьрадыёлякацыйную Х-31П, адну С-300 і 28 ударныя дроны.
Украінская супрацьпаветраная абароны зьнішчыла 26 дронаў у межах Адэскай, Харкаўскай, Днепрапятроўскай і Запароскай абласьцей.
Улады Харкаўскай вобласьці праводзяць эвакуацыю дзяцей
Адразу пасьля поўначы расейцы нанесьлі ўдар дронамі па Харкаве — пашкоджаньні атрымалі рэстаран, крама, офісныя памяшканьні.
Як паведаміў кіраўнік Харкаўскай абласной вайсковай адміністрацыі Алег Сінягубаў, уначы расейцы выпусьцілі па Ізюмскім і Купянскім раёнах кіраваныя авіябомбы. У Купянску абышлося без ахвяр, хоць пацярпелі чатыры шматкватэрныя дамы і адзін інтэрнат. У Ізюмскім раёне ў вёсцы Барава пашкоджаныя камунікацыі, пяць прыватных і тры шматкватэрныя дамы, дзіцячы садок і кацельня. Ад атрыманых раненьняў загінуў 12-гадовы падлетак.
Ад артылерыйскіх і мінамётных абстрэлаў пацярпелі яшчэ 20 населеных пунктаў вобласьці. З двух грамад улады вывезьлі 159 дзяцей.
У Расеі не пацьвярджаюць, што абстрэльвалі Харкаўшчыну кіраванымі бомбамі. Ва ўмовах вайны апэратыўна праверыць інфармацыю бакоў складана.
ГЛЯДЗІЦЕ ТАКСАМА: Расея абстраляла жылыя дамы ў Харкаве: 19 параненых, адзін чалавек загінуўАдэскую вобласьць атакавалі некалькі гадзін запар — ракетамі і дронамі
Кіраўнік Адэскай абласной вайсковай адміністрацыі Алег Кіпер паведаміў, што расейцы пачалі атакаваць рэгіён адразу пасьля поўначы — спачатку з самалёта Ту-22М3, а потым Су-30. Паводле яго, украінская супрацьпаветраная абароны зьбіла ўсе ракеты над морам.
А трэцяй гадзіне ночы расейцы атакавалі Адэскую вобласьць дронамі, а раніцай зноў нанесьлі ракетны ўдар. «Папярэдне без пацярпелых», — паведаміў Алег Кіпер.
ГЛЯДЗІЦЕ ТАКСАМА: Расея атакавала Адэсу балістычнымі ракетамі «Іскандэр». 20 чалавек загінулі, 73 параненыяУ Днепрапятроўскай вобласьці пад моцным агнём Нікапаль
Кіраўнік Днепрапятроўскай абласной вайсковай адміністрацыі Сяргей Лысак паведаміў, што ў рэгіёне ад абстрэлаў з цяжкай артылерыі пацярпелі Пакроўскі і Марганецкі раён, але найбольш — Нікапаль, дзе раненьні атрымалі два чалавекі, пашкоджаны гатэль і лінія электраперадач.
За 24 гадзіны — паўтысячы ўдараў па Запароскай вобласьці
Кіраўнік Запароскай абласной вайсковай адміністрацыі Іван Фёдараў паведаміў, што расейцы за 24 гадзіны нанесьлі 406 удараў па 7 населеных пунктаў рэгіёну.
«Атрымалі 53 паведамленьні пра руйнаваньне жылых будынкаў і аб’ектаў інфраструктуры. У часе атакі бесьпілётнікамі ў Запарожжы пацярпелі дзьве жанчыны — 72 і 74 гадоў», — паведаміў кіраўнік вобласьці.
ГЛЯДЗІЦЕ ТАКСАМА: Больш за мільён спажыўцоў засталіся без сьвятла ў выніку расейскай атакі — Мінэнэрга ЎкраіныУ Расеі сьцьвярджаюць, што Ўкраіна атакавала дронамі Белгарадзкую вобласьць
Губэрнатар Белгарадзкай вобласьці Вячаслаў Гладкоў заявіў аб ліквідацыі1 6 паветраных цэляў над Белгарадам і Белгарадзкім раёнам.
«Пацярпелых няма», — паведаміў ён.
Паводле расейскага губэрнатара, у Белгарадзе пашкоджаньні атрымалі 12 шматкватэрных дамоў, дзьве мэдычныя і чатыры адукацыйныя ўстановы.
На месцах працуюць апэратыўныя службы.
ГЛЯДЗІЦЕ ТАКСАМА: Абстрэл Белгараду. Пачаліся пажарыВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.