Reuters: Расея павялічвае імпарт бэнзіну зь Беларусі на фоне скарачэньня ўнутраных паставак

Пра гэта паведамляе інфармацыйнае агенцтва Reuters на падставе інфармацыі з чатырох галіновых і гандлёвых крыніцаў.

Звычайна Расея зьяўляецца чыстым экспартэрам паліва і пастаўшчыком паліва на міжнародныя рынкі, але збой у расейскай нафтаперапрацоўцы вымусіў нафтавыя кампаніі імпартаваць.

Расея ўжо забараніла экспарт бэнзіну з 1 сакавіка, каб забясьпечыць дастатковую колькасьць паліва для ўнутранага рынку пасьля неаднаразовых атак украінскіх дронаў на расейскія НПЗ з пачатку года.

Звычайна Расея імпартуе вельмі мала паліва з Беларусі, хоць і рабіла гэта ў жніўні-кастрычніку летась, калі сутыкнулася з дэфіцытам паліва, які прывёў да імклівага росту коштаў на бэнзін і чарговай забароны на экспарт нафтапрадуктаў.

Сёлета Расея ізноў павялічыла імпарт бэнзіну з Беларусі, і ў першай палове сакавіка ён дасягнуў амаль 3 тысяч тон, паведамляе Reuters. У лютым Расія імпартавала 590 тон, а ў студзені паставак зь Беларусі не было. Дзьве галіновыя крыніцы, якія пажадалі застацца ананімнымі, сказалі, што паміж урадамі і нафтавымі кампаніямі вядуцца абмеркаваньне далейшага імпарту.

Адна з крыніцаў адзначыла, што перамовы ішлі складана, бо Беларусь ставіць у прыярытэт экспарт свайго паліва на міжнародныя рынкі. Колькі спатрэбіцца Расеі, будзе залежаць ад тэрмінаў рамонту НПЗ, паведаміла іншая крыніца. Расійскія нафтавыя кампаніі могуць павялічыць пастаўкі нафты на беларускія НПЗ у абмен на дадатковыя пастаўкі нафтапрадуктаў у Расею, паведамілі крыніцы. Беларусь у асноўным экспартуе нафтапрадукты праз расейскія балтыйскія парты на міжнародныя рынкі ў рамках доўгатэрміновых пагадненьняў з РФ аб транзыце.

У Беларусі ёсьць два нафтаперапрацоўчыя заводы — Наваполацкі НПЗ «Нафтан» і Мазырскі НПЗ. Прадукцыйнасьць кожнага зь іх складае 12 мільёнаў тон у год, але яны звычайна працуюць з меншай магутнасьцю, кожны з якіх перапрацоўвае каля 9 мільёнаў тон у год. Пакуль незразумела, наколькі Беларусь можа павялічыць вытворчасьць.