Дзяржаўны абвінаваўца намесьнік генэральнага пракурора Беларусі Аляксей Стук папрасіў суд прызнаць Уладзіміра Катрука, абвінавачанага ў забойстве жыхароў Хатыні, вінаватым ва ўчыненьні генацыду (арт. 127 Крымінальнага кодэксу) без прызначэньня пакараньня, паведамляе БелТА.
У камэнтары дзяржаўным СМІ перад судовым пасяджэньнем Аляксей Стук заявіў, што выстаўленае Ўладзіміру Катруку абвінавачаньне цалкам пацьверджана — ягоная віна нібыта «ўстаноўленая і даказаная сабранымі доказамі».
Уладзімір Катрук памёр у Канадзе ў траўні 2015 году ва ўзросьце 93 гадоў. Пры жыцьці яго не прыцягвалі да крымінальнай адказнасьці.
У справе супраць Катрука, якую разглядаў Вярхоўны суд Беларусі, было 35 тамоў, у ёй праходзілі каля 40 сьведак.
ГЛЯДЗІЦЕ ТАКСАМА: Вярхоўны суд Беларусі пачынае разгляд справы супраць грамадзяніна Канады Катрука, які даўно памёрУладзімір Катрук — грамадзянін Канады ўкраінскага паходжаньня. Яго вінавацілі ў тым, што ён, дзейнічаючы па ўказаньні нямецкіх афіцэраў, і іншыя байцы дапаможных сілаў нямецкай паліцыі 118-га батальёну шуцманшафту выгналі жыхароў Хатыні зь іхных хатаў, прыгналі да хлява на ўскраіне вёскі і запхалі ў яго, а потым падпалілі саламяны дах. Людзей, якія спрабавалі выратавацца ад агню, эсэсаўцы расстрэльвалі. У выніку былі забітыя 149 цывільных асобаў, у тым ліку 75 непаўналетніх.
Уладзімір Катрук, архіўнае фота
У 1944 годзе Катрук дэзэртаваў зь нямецкага войска і перайшоў на бок францускага руху Супраціву, уступіў у францускі Замежны легіён і трапіў на фронт барацьбы зь нямецкім войскам. Пасьля вайны застаўся жыць у Парыжы. У 1951 годзе эміграваў у Канаду. Пры атрыманьні канадзкага грамадзянства ён заявіў, што да нацыстаў ніякага дачыненьня ня меў. Аднак у 1999 годзе канадзкім уладам стала вядома аб яго сувязях з нацыстамі, яго пазбавілі канадзкага грамадзянства. Пазьней, у траўні 2007 году, рашэньне перагледзелі празь недахоп доказаў. У лістападзе 2010 году вяртаньне Катруку канадзкага грамадзянства пацьвердзіў фэдэральны апэляцыйны суд.
У 2012 годзе габрэйскія арганізацыі, якія абвінавацілі Катрука ў датычнасьці да ўчыненых нацыстамі злачынстваў, запатрабавалі зноў пазбавіць яго грамадзянства Канады.
ГЛЯДЗІЦЕ ТАКСАМА: У Канадзе знайшлі падазраванага ў спаленьні Хатыні- Генэральная пракуратура пачала расьсьледаваньне крымінальнай справы аб генацыдзе беларускага народу ў гады Другой сусьветнай вайны два з паловай гады таму, потым зьявілася асобная справа Катрука.
- У ліпені 2023 году Аляксандр Лукашэнка падпісаў закон «Аб зьмене Крымінальна-працэсуальнага кодэксу», які дазваляе заводзіць крымінальныя справы супраць мёртвых і выносіць ім выракі паводле 10 артыкулаў Крымінальнага кодэкса (сярод іх — генацыд, экацыд, міжнародны тэрарызм, падрыхтоўка або вядзеньне агрэсіўнай вайны, ужываньне зброі масавага паражэньня, іншыя ваенныя злачынствы).