Новы закон устанаўлівае вызначэньні парушэньняў, якія тычацца абыходу санкцыяў, і прынцыпы пакараньня за іх. Апроч наўмысных парушэньняў, закон крыміналізуе гандаль зброяй ці таварамі падвойнага прызначэньня з прычыны халатнасьці.
Пасьля прыняцьця закона ЭЗ краіны-сябры абавязаныя будуць прыняць нацыянальныя законы, якія адпавядаюць агульнаму правілу. Абыход санкцыяў павінен стаць у іх крымінальным злачынствам з пакараньнем у выглядзе турэмнага зьняволеньня ня больш як на 5 гадоў. Законы павінны прадугледжваць канфіскацыю даходаў, атрыманых ад абыходу санкцыяў і скарыстаных для гэтага інструмэнтаў.
У тым ліку гэта датычыцца актываў, у дачыненьні да якіх выкарыстоўваюцца спробы абысьці санкцыі. Гэта, у прыватнасьці, можа дазволіць краінам Эўразьвязу канфіскоўваць уласнасьць расейскіх прадпрымальнікаў і кампаній, якіх западозрылі ў спробе абысьці санкцыі.
Найбольшая колькасьць санкцыйных абмежаваньняў краіны ЭЗ увялі супраць Расеі і Беларусі, у сувязі з расейскім уварваньнем ва Ўкраіну. Адной з мэтаў прынятага дакумэнта называлася ўзмацненьне санкцыйнага ціску на Маскву і расейскіх алігархаў.
За дакумэнт прагаласавалі 543 дэпутаты, 45 супраць, 27 устрымаліся.
ГЛЯДЗІЦЕ ТАКСАМА: Эўразьвяз зацьвердзіў 13-ы пакет санкцый супраць Расеі і Беларусі за вайну ва Ўкраіне ГЛЯДЗІЦЕ ТАКСАМА: Эўразьвяз падоўжыў на год санкцыі супраць Беларусі, уведзеныя за рэпрэсіі і падтрымку агрэсіі Расеі