Паводле Орбана, Трамп скароціць дапамогу Кіеву, што паскорыць спыненьне канфлікту. Пасьля сустрэчы з Трампам у інтэрвію дзяржаўнаму тэлеканалу M1 Орбан сказаў, што «відавочна, што Ўкраіна сама па сабе ня можа выстаяць».
Паездка кіраўніка вугорскага ўраду адбылася ў той час, калі рэспубліканцы ў Палаце прадстаўнікоў ЗША затрымліваюць пакет дапамогі Ўкраіне на 60 мільярдаў даляраў. Сэнат ЗША ўжо ўхваліў пакет, большая частка якога прадугледжвае закупку Ўкраінай амэрыканскай зброі і вайсковай тэхнікі.
ГЛЯДЗІЦЕ ТАКСАМА: «Маё пасланьне Пуціну простае. Мы ня сыдзем. Мы ня схілімся». Што сказаў прэзыдэнт Байдэн у Кангрэсе ЗШАПрэзыдэнт ЗША Джо Байдэн, меркаваны кандыдат ад Дэмакратычнай партыі на прэзыдэнцкіх выбарах у лістападзе, падтрымаў пакет дапамогі, але Трамп скрытыкаваў законапраект.
«Ён ня дасьць на ўкраінска-расейскую вайну ані цэнта, і таму вайна скончыцца», — гэтак выглядае пазыцыя Трампа ў пераказе Орбана.
«Калі амэрыканцы не дадуць грошай і зброі, а таксама эўрапейцы, то гэтая вайна скончыцца. А калі амэрыканцы не дадуць грошай, эўрапейцы ня ў стане самі фінансаваць гэтую вайну, і тады вайна скончыцца», — дадаў вугорскі прэмʼер.
ГЛЯДЗІЦЕ ТАКСАМА: Якімі могуць быць наступствы вяртаньня Трампа для Расеі, Украіны, Беларусі? Тлумачэньне амэрыканскага палітолягаОрбан замарозіў стасункі з большасьцю кіраўнікоў краінаў Эўразьвязу, падтрымліваючы сувязі з аўтакратычнымі лідэрамі, такімі як прэзыдэнт Расеі Ўладзімір Пуцін.
На мінулым тыдні Орбан пабываў у ЗША, дзе выступіў у кансэрватыўным Фондзе спадчыны, а пазьней сустрэўся з Трампам на курорце Мар-а-Лага ў Флорыдзе, адмовіўшыся падчас паездкі ад сустрэчаў з прадстаўнікамі дзейнай адміністрацыі ЗША.
У заяве штабу Трампа аб сустрэчы 8 сакавіка гаворыцца, што яны абмеркавалі «шырокі спэктар пытаньняў, якія закранаюць Вугоршчыну і ЗША, у тым ліку першарадную важнасьць моцных і бясьпечных межаў для абароны сувэрэнітэту кожнай нацыі».
ГЛЯДЗІЦЕ ТАКСАМА: Трамп заявіў, што «вельмі хутка» скончыць вайну ва Ўкраіне, калі яго зноў абяруць прэзыдэнтам ЗШАОрбан сказаў, што мір ва Ўкраіне павінен быць дасягнуты спачатку шляхам перамірʼя, а потым поўнага мірнага пагадненьня, для чаго ў Трампа «ёсьць сродкі».
Прэсавы сакратар Пуціна Дзьмітрый Пяскоў 11 сакавіка заявіў, што ў Крамлі ведаюць пра заяву Орбана, але не камэнтуюць. «Мы гэта бачылі, але нам няма чаго сказаць, паколькі ніякіх дэталяў няма і незразумела, што гэта можа быць за плян», — сказаў Пяскоў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.