Рашэньне набыло моц.
Апэляцыйная калегія Вярхоўнага суду Расеі адхіліла скаргу Барыса Надзеждзіна на адмову ў рэгістрацыі яго кандыдатам у прэзыдэнты, паведамляе ягоны тэлеграм-канал. Рашэньне набыло моц. Сам Надзеждзін заявіў, што ня згодны з такім рашэньнем.
«Мне здаецца, што для краіны было б лепш, калі б грамадзяне маглі самі вырашыць, каго яны хочуць бачыць у бюлетэні. Сотні тысяч чалавек заявілі аб тым, што хочуць бачыць у ім мяне», — сказаў ён.
Акрамя таго, палітык аб’явіў, што ён з сваёй камандай рыхтуе наглядную скаргу ў прэзыдыюм Вярхоўнага суду.
«А там ужо рукой падаць да Канстытуцыйнага», — дадаў ён.
ЦВК раней адмовіла Надзеждзіну ў рэгістрацыі, прызнаўшы несапраўднымі каля 15% сабраных у яго падтрымку подпісаў, правераных камісіяй, пры дапушчальных 5%.
Раней Вярхоўны суд адхіліў яшчэ два пазовы палітыка да ЦВК. Адзін зь іх датычыўся аспрэчваньня формы сьпісу зьбіральнікаў подпісаў, іншы — аспрэчваньня формы ведамасьці.
Барыс Надзеждзін быў адзіным патэнцыйным кандыдатам на пасаду прэзыдэнта Расеі, які займаў антываенную пазыцыю і выступаў супраць палітыкі цяперашняга прэзыдэнта Ўладзіміра Пуціна.
Яго кампанія прыцягнула ўвагу пасьля таго, як каля яго штабоў пачалі выстройвацца вялікія чэргі ахвочых паставіць подпісы.
У штабе Надзеждзіна сьцьвярджаюць, што сабралі больш за 200 тысяч, у ЦВК падалі, як прадугледжана законам, крыху больш за 100 тысяч подпісаў.
8 лютага ЦВК адмовіла Надзеждзіну ў рэгістрацыі, знайшоўшы ў яго подпісах больш за 15% бракаваных подпісаў пры дапушчальных 5%.
- Галасаваньне на выбарах прэзыдэнта Расеі адбудзецца з 15 да 17 сакавіка 2024 году.
- Выбары ў Расеі незалежныя назіральнікі і экспэрты ацэньваюць як несвабодныя і несумленныя.
- Улады ўмешваюцца ў выбарчы працэс, ствараюць перавагі праўладным кандыдатам, а ў шэрагу выпадкаў ідзецца аб простай фальсыфікацыі.