У выведцы Міністэрства абароны Ўкраіны заявілі, што Расея не змагла дамовіцца зь Беларусьсю аб пастаўцы частак да рэактыўных сыстэмаў залпавага агню «Град», якія вырабляе беларускае ААТ «Волатаўта».
«Супярэчнасьці ўзьніклі ў часе сустрэчы, калі дэлегацыя „Волатаўта“ прэзэнтавала паперы з разьлікамі — кошт асобных відаў беларускай прадукцыі перавышаў чаканы расейцамі на 500-600%», — адзначаецца ў афіцыйным паведамленьні Галоўнага ўпраўленьня выведкі Міністэрства абароны Ўкраіны.
Паводле вайсковай выведкі Ўкраіны, кантракт прадугледжвае, што беларускае прадпрыемства павінна паставіць расейскаму ЗАТ «Спэцыяльнае канструктарскае бюро» 250 адзінак частак, неабходных для вытворчасьці і рамонту рэактыўных сыстэмаў залпавага агню «Град».
«Пасьля напружаных перамоваў беларусы правялі дадатковую калькуляцыю і знайшлі „выхад“ для таньнейшых дэталяў: вырабляць складнікі будуць субпадраднікі, якія ня маюць адпаведных ліцэнзіяў. А гэта будзе азначаць зьніжэньне якасьці прадукцыі і, як вынік — павышаныя рызыкі выкарыстаньня сабраных з такіх дэталяў і вузлоў РСЗА „Град“», — адзначылі ў вайсковай выведцы Ўкраіны.
Беларускае ААТ «Волатаўта» і расейскае ЗАТ «Спэцыяльнае канструктарскае бюро» знаходзяцца пад міжнароднымі санкцыямі пасьля пачатку расейскага ваеннага ўварваньня ва Ўкраіну.
ГЛЯДЗІЦЕ ТАКСАМА: Беларускі складнік «Моцы новай арміі» Ўкраіны. Фотарэпартаж з выставы ў КіевеДа поўнамаштабнай агрэсіі Расеі супраць Украіны Беларусь пастаўляла шасі «Волат», якія выкарыстоўваліся для ўкраінскіх радыёлякацыйных станцыяў.