Расея ў ноч на 26 лютага нанесла ўдары па Харкаўскай і Днепрапятроўскай абласьцях.
Паветраныя сілы Ўкраіны паведамілі аб расейскай атацы ракетамі і баявымі дронамі.
Расейцы цэляць у ангары з збожжам і жылы сэктар. Ёсьць ахвяры
Расейскія войскі безь перапынку атакуюць Харкаўскую вобласьць — у выніку артылерыйскіх і мінамётных удараў пацярпелі 15 населеных пунктаў вобласьці.
У Чугуеўскім раёне два дроны ўдарылі па тэрыторыі базы адпачынку, але яна ўжо не працавала. У пасёлку Пісочын у выніку ўдараў бесьпілётнікамі ў два ангары са збожжам пашкоджана тэхніка і грузавыя аўтамабілі. Яшчэ ў некалькіх населеных пунктах расейцы пацэлілі ў прыватныя дамы. Улады сьцьвярджаюць, што ахвяр няма.
У Днепрапятроўскай вобласьці пасьля абстрэлаў бяз вокнаў засталіся тры пяціпавярховыя будынкі, пашкоджаньні атрымалі некалькі вытворчых памяшканьняў.
У Нікапалі гарэла прадпрыемства.
Ад абстрэлу ўвечары 25 лютага ў абласным цэнтры пацярпелі 10 прыватных дамоў і некалькі аўтамабіляў. У выніку шпіталізавалі чатырох чалавек.
Па поўначы Ўкраіны — Сумскай вобласьці — расейцы нанесьлі авіяцыйны ўдар. Абласныя ўлады паведамілі, што ў Юнакаўскай грамадзе загінулі двое — муж і жонка, якія знаходзіліся ў сваім доме падчас абстрэлу.
Паветраныя сілы Ўкраіны: Расея выкарыстала супраць мірных жыхароў 14 дронаў
У апэратыўным камандаваньні Паветраных сіл Украіны паведамілі, што ў ноч на 26 лютага Расея запусьціла па ўкраінскіх гарадах 14 ударных бесьпілётнікаў, адну балістычную ракету «Іскандэр-М», дзьве ракеты С-300 і тры кіраваныя авіяракеты Х-59.
Сілы супрацьпаветранай абароны змаглі зьнішчыць 9 дронаў і тры авіяцыйныя ракеты ў межах Харкаўскай і Днепрапятроўскай абласьцей.
ГЛЯДЗІЦЕ ТАКСАМА: Над Чорным морам, магчыма, зьбіты другі расейскі самалёт A-50На фронце адбылося каля ста баявых сутыкненьняў
У Генэральным штабе Ўзброеных сіл Украіны паведамілі, што за мінулыя содні ўкраінскія войскі адбілі 6 атак расейцаў на купянскім кірунку (Харкаўская вобласьць), 5 — на ліманскім, 8 — на бахмуцкім і 25 — на аўдзееўскім кірунках.
На запароскім кірунку расейцы не спыняюць штурмаў Рабоціна і левабярэжжа ў Херсонскай вобласьці.
Усяго, паводле ўкраінскага боку, на франтавых лініях адбылося 95 баявых сутыкненьняў.
ГЛЯДЗІЦЕ ТАКСАМА: Расейскія войскі зруйнавалі вакзал у Канстанцінаўцы, які зьвязваў Данбас з КіевамУ Расеі абвінавацілі Ўкраіну ў абстрэлах Белгарадзкай вобласьці
Губэрнатар Белгарадзкай вобласьці Вячаслаў Гладкоў заявіў, што Ўкраіна 25 лютага абстраляла з артылерыі і дронамі некалькі раёнаў рэгіёну.
Паводле яго, сродкі супрацьпаветранай абароны Расеі адбілі паветраную атаку Ўзброеных сіл Украіны. Вячаслаў Гладкоў сьцьвярджае, што ў выніку падзеньня аскепкаў пацярпелі прыватныя дамы, але абышлося без чалавечых ахвяр.
У Шабекінскай гарадзкой акрузе праблемы з энэргазабесьпячэньнем пасьля пападаньня ў лінію электраперадач.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.