Ізраіль прыгразіў уварвацца ў Рафах у Газе да пачатку сьвяшчэннага месяца мусульманаў — Рамадану, калі ХАМАС ня верне астатніх закладнікаў да таго часу. Уварваньне абяцаюць зрабіць, нягледзячы на міжнародны ціск з мэтай абароны палестынскіх мірных жыхароў, якія хаваюцца ў паўднёвым горадзе.
ЗША і іншыя ўрады, а таксама Арганізацыя Аб’яднаных Нацый зьвяртаюцца з усё больш настойлівымі заклікамі да Ізраіля адмяніць заплянаваны наступ на Рафах. Перамовы Ізраілю і ХАМАС, пра якія яшчэ нядаўна гаварылі як пра імаверную падзею, цяпер практычна немагчымыя, адзначае AFP.
Ізраільскі ўрад заяўляе, што горад на мяжы з Эгіптам — апошні апорны пункт палестынскай групоўкі ХАМАС у Газе. Але адначасова гэта месца, куды ўцякалі тры чвэрці перамешчанага палестынскага арабскага насельніцтва, знайшоўшы прытулак у разгорнутых намётавых мястэчках бяз доступу да дастатковай колькасьці ежы, вады і лекаў.
ГЛЯДЗІЦЕ ТАКСАМА: Эгіпет прыгразіў прыпыніць мірную дамову з Ізраілем, калі той увядзе войскі ў прымежны горад«Сьвет павінен ведаць, і лідэры ХАМАС павінны ведаць, што калі да Рамадану нашы закладнікі ня будуць дома, баявыя дзеяньні будуць працягвацца паўсюль, у тым ліку ў раёне Рафаху», — сказаў Бэні Ганц, начальнік штабу ў адстаўцы, на канфэрэнцыі амэрыканскіх габрэйскіх лідэраў у Ерусаліме.
«У ХАМАС ёсьць выбар. Яны могуць здацца, вызваліць закладнікаў, а мірныя жыхары Газы могуць адзначыць сьвята Рамадан», — дадаў Ганц, член ваеннага кабінэту, што складаецца з трох чалавек.
Рамадан пачнецца каля 10 сакавіка.
Ізраіль засяродзіў свае ваенныя апэрацыі ў Хан-Юнісе, усяго за некалькіх кілямэтраў ад Рафаху і роднага гораду лідэра ХАМАС у Газе Ях'і Сінвара, які абвінавачваецца ў арганізацыі нападу 7 кастрычніка.
ГЛЯДЗІЦЕ ТАКСАМА: Ізраіль аб’явіў аб новым вызваленьні закладнікаў у ГазеНапад ХАМАС, які пачаў вайну, забіў каля 1160 чалавек у Ізраілі, у асноўным мірных жыхароў, паводзае зьвестак AFP на падставе ізраільскіх лічбаў. Баевікі таксама захапілі каля 250 закладнікаў, 130 зь якіх застаюцца ў Газе, у тым ліку 30 меркавана загінуўшых, паводле зьвестак Ізраіля.
Як паведамляла Міністэрства аховы здароўя Газы, у выніку кампаніі ў адказ у Газе загінулі як мінімум 28 985 чалавек, пераважна жанчыны і дзеці.
ГЛЯДЗІЦЕ ТАКСАМА: Армія Ізраілю знайшла тунэль ХАМАС пад будынкам агенцтва ААН у ГазеВайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.