Угода таксама прадугледжвае вызваленьне закладнікаў, заявіў у панядзелак прэзыдэнт ЗША Джо Байдэн, якога цытуе «Голас Амэрыкі».
«Мы актыўна працуем дзеля міру, бясьпекі і годнасьці як палестынскага, так і ізраільскага народу. І я няспынна працую над гэтым, — сказаў Байдэн журналістам пасьля перамоваў з каралём Ярданіі Абдалом II. — Злучаныя Штаты працуюць над пагадненьнем аб вызваленьні закладнікаў паміж Ізраілем і ХАМАС, якая прынясе неадкладны і працяглы пэрыяд спакою ў Газе, прынамсі, на шэсьць тыдняў».
Байдэн таксама сказаў, што грамадзянскія асобы, якія хаваюцца ў паўднёвым горадзе Рафах на эгіпецкай мяжы, «павінны быць абаронены» ад атакі Ізраіля, які разглядае магчымасьць наземнага ўварваньня ў гэты густанаселены раён, у якім апынуліся больш за мільён палестынцаў.
«Ваенная апэрацыя ў Рафаху не павінна ажыцьцяўляцца без надзейнага пляну ў гарантаваньні бясьпекі і падтрымкі больш за мільёну чалавек, якія знаходзяцца ў прытулак, — заявіў Байдэн. — Мы з самага пачатку выразна заявілі, што выступаем супраць любога прымусовага перамяшчэньня палестынцаў з Газы».
Выйшаўшы на трыбуну пасьля Байдэна, кароль Ярданіі зноў заклікаў да неадкладнага спыненьня агню.
«Мы ня можам дапусьціць атаку на Рафах, за ёй абавязкова надыдзе гуманітарная катастрофа, — сказаў ён. — Мы ня можам заставацца ў баку і дазволіць гэтаму працягвацца. Нам трэба надзейнае перамір’е проста цяпер. Гэтая вайна павінна скончыцца».
Кароль Абдала II знаходзіцца з афіцыйным візытам у Вашынгтоне разам з каралевай Раніяй і насьледным прынцам Ярданіі Хусэйнам.
Ярданія і іншыя арабскія дзяржавы вельмі крытычна ацэньваюць дзеяньні Ізраілю і адмаўляюцца ад публічнай падтрымкі доўгатэрміновага плянаваньня далейшых дзеяньняў, настойваючы, што гэтаму павінна папярэднічаць спыненьне баявых дзеяньняў. Яны патрабуюць спыненьня агню зь сярэдзіны кастрычніка мінулага года, калі колькасьць ахвяр сярод мірнага насельніцтва ў Газе пачала імкліва расьці.
У апошні час адміністрацыя Байдэна заняла больш цьвёрдую пазыцыю ў дачыненьні да Ізраілю, заявіўшы на мінулым тыдні, што рэакцыя Тэль-Авіва на напад ХАМАС была «празьмернай».
Вашынгтон заявіў, што ня будзе падтрымліваць ніякай ваеннай апэрацыі, распачатую ў Рафаху, без належнага ўліку інтарэсаў цывільнага насельніцтва.
ГЛЯДЗІЦЕ ТАКСАМА: Прэзыдэнт ЗША Байдэн назваў дзеяньні Ізраіля ў сэктары Газа «празьмернымі» ГЛЯДЗІЦЕ ТАКСАМА: Ізраіль аб’явіў аб новым вызваленьні закладнікаў у Газе ГЛЯДЗІЦЕ ТАКСАМА: Эгіпет прыгразіў прыпыніць мірную дамову з Ізраілем, калі той увядзе войскі ў прымежны горадВайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.