Уладзімір Пуцін ідзе на выбары самавылучэнцам. Для рэгістрацыі яму патрэбна было сабраць ня менш за 300 тысяч подпісаў расейцаў з розных рэгіёнаў краіны ў падтрымку свайго вылучэньня.
У ходзе збору подпісаў адбываліся шматлікія парушэньні, адзначае расейская служба Свабоды. У прыватнасьці, у Санкт-Пецярбургу подпісы зьбіралі сябры ўчастковай камісіі, што ясна забаронена законам. Прадстаўнікі рэгіянальных уладаў рабілі справаздачу аб пастаўленым за Пуціна подпісе, адначасна яго расхвальваючы: у законе «стварэньне станоўчага вобразу кандыдата» ўжо лічыцца агітацыяй, а чыноўнікам і дэпутатам агітаваць забаронена.
У ЦВК падавалі заяву з патрабаваньнем не рэгістраваць Пуціна кандыдатам. Адна з падстаў — парушэньні пры зборы подпісаў, другая — «незаконныя папраўкі ў Канстытуцыю». Скаргу падпісалі 26 былых і дзейных расейскіх дэпутатаў розных узроўняў улады.
Пуцін стаў чацьвёртым зарэгістраваным кандыдатам — пасьля Ўладзіслава Даванкова ад «Новых людзей», Мікалая Харытонава ад Камуністычнай партыі Расейскай Фэдэрацыі (КПРФ) і Леаніда Слуцкага ад Лібэральна-дэмакратычнай партыі Расеі (ЛДПР). Іх партыі прадстаўленыя ў Дзяржаўнай Думе, таму зьбіраць подпісы ім ня трэба.
Усяго на пасаду прэзыдэнта прэтэндуюць 11 кандыдатаў, збор подпісаў завершыцца 31 студзеня.
ГЛЯДЗІЦЕ ТАКСАМА: «Надзеждзін выйшаў за рамкі дазволенага і ў Крамлі ім не задаволены». Ці паўторыць апанэнт Пуціна «шлях Ціханоўскай»Кіраўніца ЦВК Эла Памфілава на пасяджэньні камісіі таксама аб’явіла, што слоганам выбарчай кампаніі Пуціна стане «Разам мы сіла — галасуем за Расею». У 2018 годзе, калі Пуцін балятаваўся на чацьвёрты тэрмін, слоган гучаў так: «Наша краіна, наш прэзыдэнт, наш выбар!».
Галасаваньне на выбарах прэзыдэнта Расеі пройдзе з 15 па 17 сакавіка 2024 году. Выбары ў Расеі незалежныя назіральнікі і экспэрты ацэньваюць як несвабодныя і несумленныя. Улады Расеі рэгулярна ўмешваюцца ў выбарчы працэс, абцяжарваюць доступ апазыцыі, ствараюць перавагі праўладным кандыдатам, у шэрагу выпадкаў гаворка ідзе і пра прамыя фальсыфікацыі.
ГЛЯДЗІЦЕ ТАКСАМА: МЗС РФ: Беларусь і Расея прымуць сумесныя меры «для выключэньня зьнешняга ўмяшаньня» ў выбары