Абодве чорныя скрыні Іл-76, які разбыўся напярэдадні ў Белгародзкай вобласьці, знойдзены. Пра гэта паведаміла РИА «Новости» з спасылкай на экстраныя службы.
Па словах суразмоўцы ТАСС, прыбор рэгістрацыі парамэтраў палёту і маўленчы самапісец знаходзіліся ў хваставой частцы Іл-76. У бліжэйшы час іх даставяць у Маскву. Расшыфроўкай бартавых самапісцаў зоймецца лябараторыя Мінабароны Расеі, паведамляе ТАСС.
24 студзеня раніцай у Белгародзкай вобласьці разбыўся расейскі вайскова-транспартны самалёт Іл-76. Мінабароны Расеі сьцьвярджае, што на борце знаходзіліся 65 украінскіх ваеннапалонных, якіх перавозілі ў Белгарад для абмену, а таксама шасьцёра членаў экіпажа і трое суправаджаючых. Усе яны, паводле зьвестак ведамства, загінулі. Расейскія ўлады назвалі крушэньне Іл-76 тэрактам, абвінаваціўшы ў ім УСУ.
Украінскія ўлады пакуль не пацьвердзілі, але і не абверглі ніводную з вэрсій катастрофы. У ГУР Украіны пры гэтым пацьвердзілі, што 24 студзеня павінен быў адбыцца абмен палоннымі, заявіўшы таксама, што «ўкраінскі бок ня быў пастаўлены ў вядомасьць аб неабходнасьці забеспячэньня бясьпекі паветранай прасторы ў раёне горада Белгарад у пэўны перыяд часу, як неаднаразова рабілася ў мінулым».
У чацвер украінскія СМІ паведамілі, што па факце падзення Іл-76 Служба бяспекі Ўкраіны пачала расследаванне па крымінальным артыкуле аб «парушэнні законаў і звычаяў вайны».
Прэзыдэнт Украіны Ўладзімір Зяленскі позна вечарам у сераду камэнтуючы крушэньне расейскага вайсковага самалёта Іл-76 у Белгарадзкай вобласьці, не сказаў ні слова аб магчымых прычынах авіякатастрофы і аб тым, ці былі на борце палонныя салдаты УСУ, якія рыхтаваліся да абмену. Зяленскі заявіў, што будзе настойваць на міжнародным расьсьледаваньні катастрофы.
Прэс-сакратар Крамля Дзьмітры Пяскоў адказаў на гэтае патрабаваньне Зяленскага, «што калі ён мае на ўвазе міжнароднае расьсьледаваньне злачынных дзеяньняў кіеўскага рэжыму — яно адназначна патрэбнае», — цытуе прэс-сакратара прэзыдэнта Расеі «Інтэрфакс».
Пяскоў зноў паўтарыў, што віну за крушэньне самалёта, якое ён назваў «жахлівым цалкам актам», нясе Ўкраіна. Як тое, што адбылося, адаб’ецца на працэсе абмену палоннымі, па словах Пяскова, «вам ніхто не скажа».
У той жа час старшыня камітэта Дзярждумы па абароне Андрэй Картаполаў заявіў, што абмены ваеннапалоннымі з Украінай будуць працягвацца, нягледзячы на катастрофу Іл-76.
«Нам трэба нашых хлопцаў выцягваць, у нас няма іншага выйсьця», — сказаў Картаполаў журналістам у чацьвер.
Напярэдадні адразу пасьля катастрофы Картаполаў паведаміў, што яшчэ адзін Іл-76, на борце якога знаходзіліся каля 80 украінскіх ваеннапалонных, «пасьпелі разгарнуць». Паводле яго слоў, улады Ўкраіны ведалі аб тым, што рыхтуецца абмен і аб тым, якім чынам будуць дастаўляць палонных.
«Цяпер аб абмене размовы ісьці не можа», — дадаў ён.
ГЛЯДЗІЦЕ ТАКСАМА: «Расейцы гуляюць з жыцьцямі ўкраінскіх палонных». Зяленскі заявіў, што будзе настойваць на міжнародным расьсьледаваньні крушэньня Іл-76 ГЛЯДЗІЦЕ ТАКСАМА: Катастрофа Іл-76 пад Белгарадам: што сьцьвярджаюць Расея, Украіна і на якія пытаньні пакуль няма адказаў