Адразу некалькі польскіх выданьняў паведамілі аб зьнікненьні GPS на большай частцы тэрыторыі Польшчы, у тым ліку ў Сувальскім калідоры.
Раней праблемы з работай навігацыйнай сыстэмы назіралі ў Эстоніі і Фінляндыі ў памежных з Расеяй раёнах.
Польскае выданьне wprost.pl паведаміла, што збоі ў працы GPS фіксаваліся ў Польшчы некалькі разоў — у канцы сьнежня 2023-га, 10, 11 і 16 студзеня.
«16 студзеня палова Польшчы была пазначаная чырвоным колерам. Гаворка ідзе пра такія гарады, як Варшава, Беласток, Ольштын, Лодзь, Плоцк, Грудзёндз, Эльблонг, Гданьск, Піла, Слупск, Кашалін і Шчэцін», — паведаміла выданьне.
Узровень пакрыцьця GPS можна назіраць на адмысловай мапе, даступнай па ўсім сьвеце. Ёй карыстаюцца ня толькі звычайныя грамадзяне, але і спэцыяльныя службы, у тым ліку паветраныя і марскія.
Джон Уайзман, які кіруе сайтам gpsjam.org, у інтэрвію выданьню выказаў думку, што такія збоі могуць быць «наўмыснай спробай глушэньня ў часе правядзеньня вайсковых вучэньняў», бо тэрыторыя супадае з тэарэтычным дыяпазонам расейскіх сыстэм перашкод, разьмешчаных у Калінінградзкай вобласьці Расеі.
У Беларусі 17 студзеня зафіксавалі глушэньне GPS
Абмежаваньні GPS у Беларусі 17 студзеня 2024 году. Скрын мапы
На мапе ўзроўню працы GPS можна пабачыць, што на тэрыторыі Беларусі 17 студзеня навігацыя была фактычна недаступнай у рэгіёнах, дзе находзяцца супольныя з Расеяй вайсковыя аб’екты — у кірунку Менску, Смалявічаў, Барысава, Новалукомля, а таксама пад Воршай і Віцебскам.
ГЛЯДЗІЦЕ ТАКСАМА: Сьляпая Расея. Як армія Пуціна прайграе спадарожнікавую вайну