«Каб пазбегнуць правакацый і для прыкрыцьця межаў» на паўднёвую мяжу Беларусі накіраваныя «найлепшыя спэцпадразьдзелы Ўзброеных сіл», заявіў 31 сьнежня міністар абароны Віктар Хрэнін.
«У пунктах сталай дысьлякацыі знаходзяцца дзяжурныя падразьдзелы са скарочанымі тэрмінамі гатоўнасьці для нарошчваньня сіл у выпадку ўзьнікненьня раптоўных задач», — цытуе Хрэніна прэс-служба ведамства.
Ён па-ранейшаму лічыць, што вайсковая прысутнасць «ЗША, краін NATO ва Ўсходняй Эўропе і ў суседніх зь Беларусьсю дзяржавах застаецца на высокім узроўні».
«Ахова дзяржаўнай мяжы ў паветранай прасторы сплянаваная найбольш падрыхтаванымі разьлікамі ва ўзмоцненым складзе. Узмоцненым складам і найбольш падрыхтаванымі разьлікамі таксама арганізавана вядзеньне выведкі. Для гэтага мы задзейнічалі ўсе сучасныя сродкі, якія паступілі на ўзбраеньне», — сказаў кіраўнік міністэрства.
ГЛЯДЗІЦЕ ТАКСАМА: Хрэнін расказаў, на якую стратэгію глябальнай бясьпекі разьлічвае Беларусь ГЛЯДЗІЦЕ ТАКСАМА: Беларусь атрымала чарговы камплект «Іскандэраў», здольных несьці ядзерны зарад. Паводле Мінабароны, «не апошні»